Minister Dangui Oduber a bishita Bucuti & Tara Beach Resort

Doño y Managing Director sr. Ewald Biemans hunto cu e PR Manager sra. Crescenzia Biemans a ricibi y duna Minister Oduber un recorido amplio di henter e resort sigui pa un presentacion.

Bucuti & Tara ta un resort cu ta pa solamente personanan adulto, nan enfoke  ta riba turistanan cu ta pareha por ehempel honeymooners. Banda di esaki nan ta traha hopi duro pa ta un Eco Friendly Resort y ta haci hopi inversion na bienestar di nos medio ambiente. Actualmente Bucuti & Tara ta e hotel mas sostenibel aki na Aruba den eco-friendly.

Pa logra ta un Eco Friendly Resort Bucuti & Tara ta haci hopi, entre otro:

• A reduci maneho di desperdicio cu 65%;
• A reduci porcion di cuminda cu 30%;
• Ta haci uzo di productonan di limpiesa cu ta eco-friendly. Den baño por ehempel nan no tin shampoo di boter, pero ta usa shampoo dispensers
• Ta scapa 3.5 miyon di galon di awa pa aña. Nan ta reuza awa di baño, laba man y paña pa por muha mata. Tambe nan ta planta matanan di Aruba mes, pues matanan cu ta di nos clima cu mester di menos awa pa por sobrevivi y keda bunita. Na momento cu e clientenan check-in nan ta ricibi un beker special regaldo pa nan uza durante nan estadia, di e manera aki ta minimalisa e uzo di boter di plastic.
• Nan gym tambe ta eco-friendly. E vloer ta traha di taira recicla. Nan tin un par di treadmill cu ta genera energia pa e hotel ora cu ta uza esakinan. E machine ta conecta na un television unda e ta indica tambe cuanto energia bo a traha pa e hotel.
• Tur camber di nan tin un dehumifier y un airpurifier, esaki ta elimina tur holor desagradabel cu por tin.

Actualmente e hotel ta draai na 97% di su capacidad. Durante pandemia na momento cu Aruba a bay den lockdown, Bucuti & Tara no a cera nan porta. Tabata tin turistanan cu a dicidi pa keda Aruba y keda den e hotel aki. Otro turistanan cu mester a check out di nan hotel y kier a keda Aruba a check in cerca Bucuti & Tara. Nan tabata tin un pareha cu a keda 3 luna. Den otro palabra e hotel a draai na 50% di su capacidad durante e lockdown. Otro punto remarcabel ta cu 70% di nan clientenan ta clientenan cu ta ripiti. Esaki ta un indicacion fuerte cu nan ta keda hopi satisfecho cu nan estadia na Bucuti & Tara, segun e mandatario.

Finalmente Minister Oduber a gradici sr. Biemans pa e recorido y e bunita presentacion. Bucuti & Tara Beach Resort sigur ta un hotel pa ta sumamente orguyoso di dje.