Miembronan di Eerste kamer a bishita Aruba den cuadro di reunion anual

E Parlamentarionan di Eerste Kamer ta bishitando diferente isla. Prome cu e pandemia e bishita tabata tuma lugar 1 biaha pa aña, sinembargo pa motibo di Covid nan no a bin mas. Prome Minister Evelyn Wever - Croes conhuntamente cu Minister Endy Croes y Minister Geoffrey Wever a atende e reunion representando Gobierno di Aruba.  

Topiconan trata den e reunion

Premier Wever - Croes a splica cu den e reunion a presenta e retonan cu Gobierno di Aruba ta enfrentando.

E temanan cu a trata ta:

• Situacion financiero di Aruba;
• COHO y RAFT. Prome Minister a splica e Parlamentarionan di Eerste Kamer di e preocupacionnan cu tin acerca di e leynan aki. Pa cual nan a keda di tene cuenta cu nan;
• Combatimento di corrupcion;
• Integridad y kico tur gobierno a haci riba e tereno aki. Entre otro: Na Bureau Integriteit, trabounan andando pa keda cla cu e tratado contra corupcion, leynan di iniciativa di Parlamento pa screening y financiamento politico, y tambe ombudsman/ defensor di pueblo;
• Crisis di Venezuela y e impacto cu e crisis aki tin riba Aruba, particularmente e situacion di cantidad di personanan cu a pidi asilo, e cantidad di personanan cu ta na Aruba sin documentacion, e impacto cu esey tin riba nos infrastructura, nos enseñansa, cuido di salud, y e ayudo di Hulanda cu Aruba a ricibi.

Preguntanan di e Parlamentarionan
 

E miembronan di Eerste Kamer tambe a haci varios pregunta:

• Kico e maneho di energia ta encera particularmente pa locual ta trata combatimento di cambio climatologico y efectonan di esaki;
• Den cua area ta bay desaroya nos economia;
• Con ta bay percura pa Aruba bira un Pais mas fuerte y resiliente cu lo por absorba otro shock similar den futuro.

Prome Minister a indica cu a contesta tur nan preguntanan. 

Terminando, Premier Wever - Croes a expresa cu den combersancion cu cada uno individual, nan a duna di conoce cu nan ta contento cu e presentacion y cu esaki ta e mihor presentacion cu nan a haya durante nan biahe. Gobierno di Aruba tambe ta di opinion cu tabata un bon reunion y cu e Parlamentarionan tabata asina receptivo pa scucha.