Mester cuminsa prepara nos profesional- y hobennan pa scoge careranan den e sector di hydrogeno

E energy valley mester bira e desaroyo nobo pa ful e zona di e refineria. Na Hulanda Minister Croes y e delegacion a haya apoyo di Arubahuis, di companianan di gobierno Hulandes y di Sr. Patrick Cnubben kende ta e persona encarga cu ful e desaroyo di Hydrogen na Hulanda.

Awor ta bay tin un proceso di educacion pa prepara Aruba su companianan y nos hendenan pa e desaroyo nobo aki. Segun Minister Glenbert Croes esaki ta un gran oportunidad pa un gran futuro pa pais Aruba y futuro generacion.

Riba ultimo dia di na Hulanda, Minister Glenbert Croes a reuni cu Minister Plenipotenciario di Aruba Sr. Ady Thijsen na Arubahuis. Durante e reunion a discuti diferente aspecto, entre otro, con ta bay continua cu e ehecucion di Aruba Hydrogen Valley cu e apoyo cu ta desea di gobierno di Hulanda, di Brussel y posibilidad di un consorcio cu Hulanda hunto cu Spaña pa haci e desaroyo di Aruba Hydrogen Valley bira un realidad  mas pronto posibel. Tambe a reuni riba e necesidad mirando cu aki 30 luna lo bay stop di uza heavy fuel oil cu ta contaminando nos medio ambiente y switch pa LNG cu ta gas natural.

Cu e tema aki Arubahuis lo bay asisti Aruba hunto cu gobierno di Hulanda cu e apoyo cu mester pa por finalisa tur preparativo pa ehecucion di e proyecto Eagle LNG. Aparte di esaki tambe den e ultimo dia na Arubahuis a trata e tema di studiantenan di Aruba. Minister Croes ta haya cu studiantenan mester haya guia, mirando e desaroyo nobo cu ta bin pa Aruba, y for di Aruba caba, orienta nan pa scoge careranan pa desaroya nan carera profesional den otro sector cu no ta turismo.

A  palabra cu ta bay introduci un ‘studenten arbeidsmarktbegeleiding’ cu ta un bureau na Arubahuis pa yuda studiantenan cu ta cabando na Hulanda pa logra trece nan bek  Aruba. Gobierno su deseo ta, pa tur profesional y tur hoben cu termina c unan estudio por tin un posibilidad pa un carera na Aruba. P’esey mes a papia cu Minister Plenipotenciario Sr. Ady Thijsen cu a duna tur su apoyo. Esaki ta e gran rol cu Arubahuis tin tambe den e brug entre Aruba y Hulanda.