Medidanan pa preveni COVID-19 ta vigente riba lama tambe

ORANJESTAD- Wardacosta ta eherce patruyanan pa haci control riba lama.

E patruyanan aki ta pa entre otro mantene ordo publico y controla riba e medidanan di COVID-19.

Boto di placer y jet ski den lama dilanti Hotel Ritz Carlton. Ultimo dianan Wardacosta a tene varios control riba lama relaciona cu e ultimo Decreto Ministerial cu a sali encuanto COVID-19. Wardacosta ta enfatisa cu e reglanan implementa pa Gobierno di Aruba ta na vigor riba lama tambe.

Pa e motibo aki control lo wordo haci riba lama y rif, entre otro pa aglomeracion. Wardacosta ta corda usuarionan di boto di placer y boto di piscado, cu riba un boto por tin un maximo di 4 persona. Pa botonan comercial ta conta e regla di maximo 50% di e capacidad total. E ley seco di alcohol ta valido riba tur boto y rif y Wardacosta lo controla debidamente riba consumo di alcohol.

Por ultimo e medida di Toque de Queda entre 10:00 pm y 5:00 am ta conta pa e usuarionan di rif y lama tambe. Solamente botonan di piscado cu tin permit pa pisca conforme nan ‘vergunning’ por ta riba lama durante Toque de Queda. Pues entre e orario di Toque de Queda no ta permiti ningun otro boto riba lama.

Wardacosta ta pidi tur persona pa mantene nan mes na regla y percura pa bo tin bo documentonan di nabegacion hunto cu bo abordo. Tene cuenta cu e medidanan di COVID-19 ta pa proteha nos mes y otronan.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options