Mas cu136.000 turista crucero den off season 2013 (gearchiveerd)

Durante 2013 e barconan di Pulmanntur Horizon y Monarch of the Seas lo tin 48 trip pa Aruba y pa 2014, Aruba por conta cu un “year around” esta 52 bishita.
Fuera di esey, Aruba lo ta fungi como home port, esta e turistanan lo aborda y desembarca na Aruba haciendo uzo di e conexionnan aereo. E turistanan lo ta grandemente procedente di paisnan di Centro y Sur America, un otro mercado compara cu esun Norte Americano.
E barconan Horizon y Monarch of the Seas lo bishita tambe otro hafnan manera La Guaira, Corsou, Panama y Cartagena.
E temporada di mei pa october ta conoci como un temporada abou pa turismo crucero den henter Caribe, pero ehecutivonan di Aruba Tourism Authority y Aruba Ports Authority N.V. ta reuni constantemente cu ehecutivonan di companianan crucero pa trece mas turista Aruba. Asina ya caba a logra cu companianan manera Carnival Cruise Lines y Royal Caribbean Cruise Lines a aumenta nan bishita na Aruba.
ATA su deseo ta pa logra cu maske ta 10% di e turistanan crucero, dicidi pa bishita Aruba pa un periodo mas largo y tambe pa bira “stay overs”.
Por menciona cu cantidad di turista “stay overs” durante luna di juni 2012 a crece cu 7.5%, teniendo cuenta cu luna di juni ta conoci como un luna dificil pa turismo.