Marriott International lo yuda educacion di medio ambiente (gearchiveerd)

Departamento di Enseñansa hunto cu biologo dr Richard Murphy di Ocean Futures Society lo traha riba e programa cu tin como meta pa conscientisa e hobennan tocante cuido di medio ambiente, specialmente e ecosistema marino. Lo dedica atencion na e saliñanan cu ta inclui e mangelnan, especienan den peliger, rifnan di coral, awa y energia.
E proyecto ta den cuadro di e maneho di Gobierno pa un desaroyo sostenibel y “Green Aruba”.
Tambe Sr. Marriott a pone su mes na altura di e trabounan di construccion di e hotel Ritz Carlton cu lo habri su portanan na 2014. Durante un reunion cu prome ministro Mike Eman y ministro di Turismo Otmar Oduber, Sr. Bill Marriott a expresa palabranan di elogio pa e maneho cu Gobierno di Aruba ta hiba riba tereno di Turismo. Aki a referi na entre otro e promocion den exterior, crea mas airlift y e conocemento cu Aruba tin.
Pa loke ta e conocemento prome ministro Mike Eman a acerca Sr. Marriott pa bini cu un Bill Marriott Insitute cu por duna educacion den turismo riba diferente nivel. Pa medio di e instituto aki Aruba lo por exporta conocemento di turismo.Varios pais den region ta mirando Aruba como un “frontrunner” den e industria di turismo y e mandatario Arubano ta kere cu Aruba por ofrece hopi riba tereno di educacion di turismo na otronan.