Mantencion di fonteinnan den Oranjestad

ORANJESTAD - Director di Departamento di Obra Publico (DOW) Marlon Croes a elabora riba e situacion di mantencion di fonteinnan cu tin den Oranjestad.

Actualmente tin 3 fontein:

  1. Plaza Padu patras di Bestuurskantoor;
  2. Plaza Daniel Leo;
  3. Fontein situa entre Penha y La Moderna.

Fontein Plaza Padu

Plasa Padu LampeE ekipo di luz y sistema di cashi di coriente a wordo vandalisa, consecuentemente e luznan no ta cende. Aworaki ta den proceso di haci mantencion grandi riba dje. A pidi piedranan nobo pa e fontein y trabounan a cuminsa di remove e piedranan daña cu tabatin prome. Lamentablemente durante e periodo di mantencion e contratista a bira malo un tempo cual a trece algun tardansa, pero e siman aki nan a reanuda trabou. Ta calcula pa dentro di 1 pa 2 siman lo keda cla cu esaki. Ademas tin contratista atendiendo cu e cashi di coriente pa e luznan drenta den funcion bek.

Fontein Plaza Daniel Leo

E fontein aki tabata tin un problema mas grandi compara cu esun di Plaza Padu. Tabatin dos palma den baki na e fontein, cu durante ultimo añanan a crece y bira grandi. Consecuentemente nan a scheur e muraya di e fontein, pues a transplanta e palmanan aki pa Bushiri. Asina mesora e trabounan di mantencion a cuminsa riba e muraya di e fontein aki. trabou tin cu sigui pa drecha piedranan y tegels cu a daña pa cual a haci e pedido pa esakinan. Lamentablemente e piedranan cu mester pa e fontein aki no ta disponibel aworaki na Aruba, pero manera cu ricibi esakinan lo reanuda e trabou pa finalise prome cu fin di aña. Mester menciona cu e cashi coriente y e luznan ta bon, pues manera cu materialnan cu falta yega, lo finalisa e trabou pa fin di aña  e fontein Plaza Daniel Leo ta den bon condicion.

Fontein memey Penha y La Moderna

Director Departamento Obra Publico (Dienst Openbare Werken -DOW) dhr. ing. Marlon. CroesA tuma nota cu tin basta molester di e fontein aki ora cu e ta den operacion vooral cu awa. Pa e motibo aki DOW a hacie ful bashi actualmente. E fontein ta den planificacion pa mantencion grandi tuma luga na dje den curso di 2023. Pero considerando e situacion di molester, mester hiba discusion amplio den seno na DOW, cu gobierno y gremionan comercial, pa wak futuro di e fontein aki y kico ta e mihor manera pa atende cu esaki. A haya diferente oido di diferente angulo cu ta indica pa mihor elimina e fontein, pa motibo di e molester y pues lo evalua kico ta mas mihor.

Sr. Croes a expresa cu si elimina e fontein pa via di e molester, esaki kiermen cu ta “give in” den e desaroyo di caya grandi den su totalidad. E otro opcion ta pa drech’e y haci e trabounan necesario pa keda mantene den bon condicion y trece e atributonan cu ta mehora caya grandi por ehempel bon iluminacion, bon servicio di limpiesa, bon mantencion y mas wowo den caya, cu e ora ey e molester lo por wordo reduci.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options