Lo traha cedula na Aruba mes

Departamento di Registro Civil y Censo ta opina y ta convenci cu door di produci e cedula na Aruba mes, Pais Aruba por logra un proceso mas eficiente y efectivo pa produccion y entrega di cedula di Aruba. Tambe esey lo resulta den menos gasto pa e pais.
Ministro di Asuntonan General a bay di acuerdo cu e proposicion di Censo.

Desde 1 di november 2003 cedula di Aruba ta wordo produci door di e compania Sagem-identification/Morpho na Hulanda. E cedulanan ta wordo manda Aruba cada dos siman.

Como cu e contracto cu e compania Sagem-identification/Morpho a wordo termina, tin un cantidad limita di cedula disponibel. Pa tal motibo desde 7 di juli 2014 te november 2014 Censo lo por tuma solamente peticion pa cedula den circunstancianan hopi excepcional y den casonan sumamente urgente. Despues di november 2014 lo no tuma ningun peticion te cu proximo aviso. Departamento di Legislacion y Asuntonan Huridico ta trahando riba un proyecto di ley pa prolonga e validez di e cedula actual te ora cu e proyecto pa e modelo nobo di cedula finalisa y cu e cedula nobo lo wordo produci localmente.