Lo rescata “Cas di Tan Tin”

Propiedad di  Sra. Faustina Tromp, cariñosamente yama “Tan Tin” pa su sobrina- y sobrinonan.

E cas aki ta un di e poco casnan na Aruba cu ainda tin mueble y artefacto den dje, cu ta mas di 50 aña bieu. E ta un di e tiki casnan cu ainda tin su mangazina unda antes e cunukeronan tabata warda tur nan hermentnan di traha den cunucu y nan simiyanan pa planta pa e siguiente cosecha. E tin ainda su regenbak y baño cu wc pafo, y den cushina ainda tin un fogon. Tur bentana y porta ainda ta di ‘blat di palo’.

Tan Tin mes tabata cuida y mantene su cas, te cu awor na edad di 80 aña. Recientemente el a dicidi cu e no por sigui cu e encargo aki mas. E trabou di mantencion di su cas a bira mucho pisa p’e y un di su deseonan ta pa su cas por keda manera cu e tawata semper.

Asina Fundacion Mi Cutisa (FMC) a buska ayudo di AIB-bank, Monumentenfonds y Minister di Cultura, pa asina conserva e cas.