Lo ancra Derecho di Naturalesa den nos Constitucion

A crea e concepto di ley den consulta cu varios organisacion y experto local y internacional. Despues di e prome dialogo cu Parlamento y Conseho di Minister, a entrega e concepto di ley na Directie Wetgeving en Juridische Zaken (DWJZ) dia 21 di april 2023.

Unabes cu e concepto ta revisa, lo controla e calidad y efectividad di legislacion y inicia e consulta cu varios stakeholders cu lo haya oportunidad pa dialoga y duna feedback riba e concepto di ley. E stakeholders ta entre otro Parlamento, organisacion ambiental, comercio y esnan cu ta practica ley.

Asina gobierno ta crea un base solido cu participacion di comunidad pa e concepto di ley final ta un logro pa pueblo henter.

Raad van Advies ta e organo di gobierno cu ta duna conseho riba e leynan proponi. Bureau di Minister Arends, DNM y DWJZ ta adapta e concepto di ley a base di sugerencia di e stakeholders presenta na Raad van Advies.

Despues ta entrega e proposicion di ley y conseho di RvA na Parlamento mientras Parlamento por haci pregunta por escrito y ricibi contesta di Minister den preparacion pa e reunion publico. Den Parlamento lo culmina e proceso legislativo pa ancra Derecho di Naturalesa den constitucion. Mirando cu ta trata di cambio den Constitucion, e proposicion ta rekeri sosten di dos tercera parti di Parlamento.

Reconociendo Derecho di Naturalesa den nos sistema legal ta un paso fundamental pa proteha e integridad ecologico di nos planeta, proteha Aruba su Naturalesa y asegura un futuro sostenibel pa e proximo generacion.