Manera ta conoci Aruba tin un Ley di Cacho (Hondenverordening). Den e ley tin responsabilidad, tarea y autoridad nan cu ta regarda Korps Politie Aruba (KPA), Bureau City Inspector (BCI) y e ciudadano en general. Pa logra cumplimento di e Ley, como tambe metanan di e plan nacional y e campaña, ta importante pa comunidad ta bon informa riba e esaki.
E ciudadano cu ta doño of ‘houder’ di un cacho ta obliga y tin e responsabilidad pa tene su cacho den cura, of si no tin cura, na e reglanan stipula. Su autoridad ta dirigi riba decisionnan cu e por of mester tuma na bienestar di su mascota.
E tarea di control y ehecucion di e Ley di Cacho primordialmente ta cay bou di tarea di Polis, pero ta comparti esaki hunto cu BCI.
Den e cuadro aki BCI (tambe) tin e autoridad pa duna advertencia y nan ta ekipa cu BAvPol, cu kiermen “buitengewone agenten van politie” cu por duna multa. Pues ora un cacho ta los riba caya y ta causa molester y/of forma un peliger pa otro (persona y /of animal) por tuma contacto cu Bureau City Inspector (BCI).
Un situacion di incidente caminda un cacho a morde hende of bestia, si ta cay directamente bou di tarea di Polis (KPA).
Den e campaña cu Post Aruba N.V., ta trata na stimula comportacion responsabel di doñonan di cacho. Como doño di e cacho bo lo ricibi un advertencia den bo brievenbus e prome bes cu encontra bo cacho riba caya. E segundo biaha por ricibi un multa ora cu autoridad pasa di bishita, y bolbe encontra bo cacho riba caya.
Gobierno di Aruba ta haci un suplica na comunidad pa tene nan mes na e reglanan di e Ley di Cacho y asina actua di un forma responsabel y civico.
Share this page