Invitacion na empresarionan y fundacionnan pa Webinar Economia Social

Dit item is gearchiveerd op 26-11-2020.

ORANJESTAD - Durante e pandemia hopi companianan na Aruba a incorpora trabaonan voluntario y comunitario pa asina yuda esnan mas den necesidad.

Empresarionan social y tradicional cu ta opera na Aruba a haci nan mayor esfuerso pa adapta nan manera di haci negoshi y a cuminsa opera via Whatsapp, delivery y otro metodonan social.

Riba diaranson 4 di november, 9 ‘or di mainta Minister Xiomara Maduro conhuntamente cu Departamento di Asuntonan Economico, Comercio y Industria y su stakeholder nan di Mayotte, Groenland y Comision Europeo lo tene un webinar netamente pa e companianan tradicional y social y tambe fundacionnan. Meta di e webinar ta pa haya sa mas con e Empresarionan Social den otro regionnan a adapta na e pandemia di COVID-19 y a sigui genera actividad economico y empleo, pero a keda incorpora e componente social y medio ambiental den nan modelo di negoshi.

E webinar aki lo trece empresarionan Arubano hunto cu empresarionan di otro LGO y UPG manera Groenland y Mayotte. Di un banda, e participantenan lo scucha e miho practicanan di otro pa asina incorpora e componente social mas mihor den nan modelo di negoshi. Di otro banda, esaki lo mustra Comision Europeo, cu tambe lo participa, cu Aruba ta forma parti di un cooperacion serio cu otro LGO y UPG, pa asina probecha di e recursonan di Union Europeo destina pa Empresarionan Social.

E webinar cu e titulo, Covid-19: Social Economy, an opportunity to transform the Europe of the Sea, ta habri pa tur interesado den e tema, en especial e compania y fundacion cu kier conoce mas forma pa contribui na su comunidad den balansa cu e aspecto empresarial.

Pa registra por bishita e siguiente link:  https://docs.google.com/forms/d/e/1FAIpQLSeexcTdLqrRKfWN2MryYN1lzQTUy4zNjaRQ-IlhW3QAYpBmRw/viewform of por bay na e Facebook page di Idea-Aruba of Departamento Asunto Economico Deaci pa asina haya e link pa registra. Tambe por comunica cu Sra. Zulema Dabian-Erasmus via z.erasmus@deaci.aw pa mas informacion.

Webinar Economia Social

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options