E mandatario a haya un presentacion riba e estudio cu e facultad a haci riba locual ta e satisfaccion y percepcion di tur esnan cu ta labora den e industria hotelero.
Pa realisa e estudio aki a haci un encuesta den e sector di cual un total di 569 trahador a participa. Awor cu e estudio a keda finalisa, a public’e y present’e na entre otro Ministerio di Turismo y Salubridad, ATA, AHATA, ATSA y tambe na e otro partnernan cu ta importante den nos unico pilar economico.
Según e resultado, 76% di e participantenan a indica cu nan ta satisfecho laborando den e industria turistico. Otro punto importante cu a resalta di e estudio ta cu locual ta e salario y beneficionan ta keda importante, pero e no ta loke ta mas importante den e parti decisivo di nan trabou.
E resultado di e investigacion ta duna un bon bista di e situacion actual di esnan cu ta labora den e industria. E ta duna un bista riba e grado di satisfaccion, un bista di e percepcion cu tin riba e beneficio y salarionan. E ta duna un bista tambe di con ta trata esnan cu ta labora y kico nan ta pensa di nan orario di trabou. Pues e investigacion a duna un bista general di con e situacion di trabou ta den e industria di cual a resulta cu 76% tabata satisfecho di ta laborando den e industria.
Minister Oduber ta haya esaki un resultado hopi positivo teniendo na cuenta cu Aruba ta depende completamente for di turismo.Nos hendenan ta e mayor patrimonio den Aruba su turismo.Ta e personanan cu ta traha den turismo ta esnan cu ta atende tur dia cu e turistanan y ta nan ta esnan cu ta brinda e calidad halto di servicio cu Aruba ta conoci pe.
Ta danki na tur esnan cu ta traha den e industria di turistico na aña 2022 Aruba a conoce cifranan halto di turista y e proyeccion pa aña 2023 ta mustra aun mas mihor.
Minister Dangui Oduber a gradici Universidad di Aruba, facultad di Tourism & Hospitality pa haci e investigacion y tambe tur e studiantenan cu a haci e encuesta aki posibel.
Share this page