E medida aki ta uno cu ta competencia di e Ministro di Relacion Exterior di Reino, ya cu maneho di visa ta un asunto cu ta concerni Reino Hulandes.
A yega na e decision aki despues cu a constata cu e situacion na Venezuela a empeora, ademas cu e incidencia di migracion iregular for di e pais aki pa e paisnan bisiña a conoce un aumento alarmante. Esaki a conduci cu ya caba varios pais, e.o. Peru, Panama, Ecuador, Guyana, Trinidad & Tobago y Chile a dicidi di introduci un visa pa tur portador di paspoort Venezolano.
Introduccion di e visa aki ta forma parti integral di un serie di medida cu ta tuma pa controla e fluho migratorio regular di Venezuela den direccion di nos islanan. E tempo cu e medida aki lo keda na vigor ta depende di e desaroyonan na Venezuela. Na momento cu e condicionnan aki mustra cambionan faborabel, por elimina e medida. Introduccion di e visa lo tuma 6 luna. E proceso di introduccion ta exigi tempo, pa motibo cu mester aloca e medio y personal adicional necesario na e Embahada di Reino na Caracas pa por procesa e peticionnan pa visa.
Otro medida complementario pa contra-aresta e fluho migratorio ta consisti di e.o. un ESTA-A, pa autorisacion di e biahe, e Advanced Passenger Information system pa controla e informacion adelanta di tur biahero y e introduccion di Pre-boarding checks, cuta un procedura pa controla tur biahero prome cu nan subi avion.
Ta importante menciona cu e medida di visa lo conoce algun excepcion. Pasaheronan cu ta den posesion di un visa valido of un permiso di estadia pa e paisnan Merca, Canada, Inglatera (Reino Uni) y Irlandia, no tin mester di un visa pa biaha pa Aruba, Corsou of Boneiro.
E situacion di Sint Maarten ta un poco diferente, debi cu e isla ta parti den un parti Frances y e otro Hulandes. Pa e introduccion di e visa ta efectivo, lo negocia cu e autoridad Frances pa por efectua e control necesario di e medida di visa. Na final Sint Maarten tambe lo forma parti di e programa di visa.
Share this page