Institucion departamento pa Inspeccion di Siguridad Maritimo y Aereo (gearchiveerd)

Siendo un isla chikito cu ta depende di turismo pa su economia, Aruba mester por garantisa e siguridad di su bishitantenan cu ta bini sea cu barco of avion. Y como parti di Reino Hulandes, Aruba ta mara na tratadonan internacional riba tereno di siguridad aereo y maritimo. E dos metanan aki a haci cu ministro encarga cu asuntonan aereo y maritimo, Sr. Otmar Oduber a institui e departamento di Siguridad Maritimo y Aereo.
E tratado internacional pa siguridad aereo a drenta na vigor na 1944 y esun pa siguridad maritimo na 1974.
Sinembargo e sucesonan na Merca dia 11 di september 2001 a haci cu rond mundo a intensifica e medidanan di siguridad tanto na aeropuerto como den haf.
Pa cumpli cu e tratadonan internacional y e medidanan di siguridad, Aruba a bini cu un ley pa siguridad aereo y maritimo y tambe a implementa diferente medida di siguridad.
Pero a keda falta un entidad cu ta supervisa si en berdad esnan concerni ta cumpli cu tur e leynan di siguridad.
”Aruba su nivel di siguridad portuario ta hopi halto y cu e departamento nobo lo reforsa esaki mas ainda y lo cumpli tambe cu e rekisitonan riba nivel di siguridad internacional’ segun ministro Oduber.