Inmigracion Aruba ta rectifica e proceso nobo tocante formulario di autorisacion pa biaha cu menor

ORANJESTAD - Riba diaranson 6 di juli 2022, Inmigracion Aruba a anuncia e proceso nobo den cuadro di permiso pa biahamento di hobennan cu ta menor di edad.

Considerando cu algun mayor lo ta biahando sea awe of den transcurso di siman, Inmigracion Aruba ta rectifica e proceso nobo cu a anuncia ayera, y lo acepta e proceso anterior cual ta encera e carta firma door di ambos mayor.

Sinembargo, por download e formulario pa permiso pa biaha cu menor aki.

Mirando cu vakantie grandi di scol ta acercando, hopi famianan ta biaha y den cierto casonan tin menornan di edad envolvi. E proceso actual ta encera cu mester di un carta, firma pa un di e mayornan, unda cu ta duna autorisacion pa asina sali for di Aruba cu e menor di edad. Den practica, e proceso aki semper a trece contratiempo na momento di controla e documentonan cu ta ser entrega, y na varios ocasion a trece confusion, retraso y perdemento di vuelo acompaƱa pa consecuencianan pa Inmigracion Aruba. Pa e motibo aki, Inmigracion Aruba a introduci un formulario nobo, pues un maneho nobo cu ta tene cuenta cu e derecho di mucha, pa preveni secuestro di mucha.

Den pasado, tawata tin casonan caminda sea un mayor of cualkier otro persona ta probecha di e situacion y ta bandona Aruba cu e mucha menor di edad sin conocemento di e otro mayor. Pa e motibo aki, a scoge pa bin cu un proceso nobo, caminda lo usa un formulario uniforme, unda no lo rekeri mas di e geboorteakte. E sistema aki lo percura pa asina por tin un database mas amplio y miho control di parti di Inmigracion Aruba y ta mantene e procesonan corto y mas eficiente.

Inmigracion Aruba lo keda monitorea e situacion, y lo evalua e posibilidad di implementa e proceso nobo aki, entrante 18 juli 2022.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options