En total tabata tin 78 registracion, unda cu un biaha mas, ambos localidad na Oranjestad y San Nicolas a yena nan cuponan por completo.
E programa “BeYourOwnBoss” ta un curso presenta pa Qredits Aruba cu e meta pa educa y prepara e cursistanan pa ta un empresario exitoso den futuro. Qredits ta conoci pa su “micro financing” di empresanan existente y tambe start-ups, y tin un trayectoria di yuda empresarionan cu nan negoshi.
“BeYourOwnBoss” lo ofrece e cursistanan mas conocemento di e mercadeo, con pa skirbi un plan di negoshi y plan financiero y tur e rekisitonan cu ta necesario y importante ora di habri un negoshi y maneha esaki apropiadamente. Den pasado mas di 200 persona a finalisa e curso exitosamente y a ricibi nan certificacion.
E curso a cuminsa dia 23 di augustus y lo termina dia 13 di october. Lo duna les riba diamars y diahuebs di 6:30 pa 9:00 di anochi na Colegio EPI y na EPB San Nicolas. E docentenan Mr. Jeandré Hessen y Ms. Twyma Van der Biezen lo duna e curso aki.
Gobierno di Aruba ta contento di por continua e colaboracion cu Qredits Aruba pa por haci e curso aki mas accesibel.
Minister di Asunto Economico, Geoffrey Wever ta desea tur e cursistanan hopi exito y perseverancia pa finalisa e curso exitosamente.
Share this page