Indicadornan di hotel pa juni 2022 ta sigui demostra un recuperacion fuerte

ORANJESTAD – Recientemente AHATA a publica su cifranan tocante e prestacion di e hotelnan.

Minister di Turismo, Dangui Oduber ta indica cu e cifranan aki ta ilustra e comparacion entre juni di 2019, juni 2021 y juni 2022. E cifranan cu a ser ricibi pa cu luna di juni 2022 ta sigui demostra un recuperacion fuerte.

Minister di Turismo y Salud Publico sr. Dangui Oduber. Manera ta conoci e maneho di gobierno ta dirigi riba turistanan di calidad y turistanan cu ta gana mas di 150 mil dollar pa aña, cu turistanan cu ta laga hopi placa atras den nos economia.

Den luna di juni 2022 e grado di ocupacion a subi cu 17% porciento compara cu juni 2021. Si compara esaki cu e grado di ocupacion di aña 2019 cu ta un aña record pa Aruba su turismo, e ta solamente 3% menos. Aruba ta e di 2 pais na mundo cu a recupera su turismo di e forma aki.

Banda di e grado di ocupacion e REV PAR den luna di juni 2022 a conoce un crecemento di 31.6% den comparacion cu luna di juni 2021 y crecemento di 18.7% den comparacion cu juni 2019. E REV PAR den juni 2022 tabata $223.97 cu ta un cifra impresionante. E REV PAR ta un indicador sumamente importante pa midi e calidad di turistanan cu ta bin Aruba. E REV PAR ta e prijs cu un turista ta dispuesto pa paga pa un camber pa anochi. Nos como pais mester ta contento cu e hecho cu nos tin un di e REV PAR mas halto den Caribe. Na momento cu bo tin un REV PAR asina halto e ta bisto cu turistanan di calidad ta yegando nos pais.

Otro indicador hopi importante ta e ADR (average daily rate) cu tambe a conoce un aumento di 22.1%. E average daily rate den luna di juni 2022 ta $277.52 den comparacion cu juni 2019 cu esaki tabata na $227.32.

Turismo ta keda e driver principal di nos economia, resultadonan di luna di juni ta confirma cu recuperacion di Aruba su Turismo ta riba e bon caminda. Maneho di ministerio di Turismo ta dunando e resultado conforme e vision di atrae turistanan di calidad y esaki a wordo confirma cu cifranan di AHATA. Esaki sigur ta un noticia hopi positivo.

Minister di Turismo, Sr. Dangui Oduber ta gradici tur empleadonan y tur partnernan den sector turistico pa cu e resultado bunita aki.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options