Incidente di turtuganan pega den reda ta un acto contra ley di proteccion flora y fauna di Aruba

Directie Natuur en Milieu (DNM) ta lamenta cu e incidente aki a tuma luga.  Na e mesun momento ta uza e oportunidad aki pa informa cu loke a sosode ta un acto contra ley, art 4 di Landsbesluit Inheemse flora y fauna” y tambe contra e Natuurbeschermingsverordening art 4, 5 y 6.

Pa locual ta trata e uzo di e reda(nan) na e localidad situa zuidoost di nos isla, tambe ta contra ley. E autoridad concerni, den e caso aki, ta Kustwacht y KPA cu ta trata cu e ehecucion di e ordenansa di piscamento cu reda (Verordening op het vissen met sleepnetten) y tambe e Visserijbesluit. Den e leynan menciona ta specifica kico pa premisibel relaciona cu e grandura di e wowonan di e reda, su largura y na unda por uz’e.

Ta recorda pueblo cu DNM y Gobierno di Aruba ta tuma na serio incidentenan contra nos naturalesa y medio ambiente. DNM ta aprecia e trabounan cu TurtugAruba ta haci y e boluntarionan como tambe Kustwacht, KPA y e doño di boto la Tatiana pa e ayudo cu nan a duna na momento di melding urgente aki. Pa cualkier melding contra nos naturalesa y medio ambiente por haci esaki riba e plataforma InfrAruba.com