Implementacion di un sistema sostenibel ta necesario pa sigui garantisa e nivel di siguridad den aviacion na Aruba

ORANJESTAD- Den luna di september, e trabounan pa loke ta trata evaluacion di cumplimiento den sector di aviacion di Aruba a cuminsa.

E team di ICAO (Organisacion Internacional di Aviacion Civil) a tene diferente sesion extensivo pa repasa tur e leynan, procesonan actual di aviacion civil, pa cuminsa identifica puntonan di mehoracion.

Delegacion ICAO (Organisacion Internacional di Aviacion Civil) a bishita Departamento di Aviacion Civil di Aruba (Directie Luchtvaart Aruba).E meta ta pa Aruba bira lider den aviacion den Caribe. Pa logra esaki, ministerio di transporte, hunto cu Departamento di Aviacion Civil di Aruba (Directie Luchtvaart) a compromete pa tuma pasonan pa incrementa e nivel di cumplimento cu e standardnan di ICAO.

Despues di 5 dia intensivo unda e expertonan di ICAO y tambe e team di Directie Luchtvaart di Aruba, a cuminsa pasa door di tur e leynan y procesonan cu ta resorta bou di Directie Luchtvaart pero tambe den cooperacion cu ANSA y aeropuerto. Nan a atende cu entre otro, asunto  di certificacion y vigilancia di aeropuerto, navegacion aereo y operación di vuelo y licencia, dunando guia y asistencia den cada un di e temanan menciona.

Minister di Transport, Intergridad, Naturalesa y Asunto di Grandinan, Ursell Arends a haci un bishita na Directie Luchtvaart unda a cera conoci cu e team di ICAO pa asina haya un resumen  con e evaluacion ta bayendo y con e team ta mira cu Aruba ta posiciona pa cu un posibel audit cu lo por tuma luga otro aña.

Delegacion ICAO (Organisacion Internacional di Aviacion Civil) a bishita Departamento di Aviacion Civil di Aruba (Directie Luchtvaart Aruba).E team di ICAO a indica cu nan ta sumamente positivo con e proceso ta andando y con e team di profesionalnan den e sector ta trahando cu dedicacion pa hisa Aruba su nivel di siguridad di aviacion civil. Nan ta admira e compromiso cu Directie Luchtvaart tin pa implementa un sistema cu ta cumpli cu standardnan internacional di aviacion.

Un cos ta pa implementa e sistema, y otro cos ta pa sostene e sistema.

Un punto di mehoracion cu a menciona ta e sostenibilidad di e sistema cu lo tin cu desaroya y implementa. Esaki no por pasa solamente pa e audit, pero ta encera mantenimento tambe. ICAO su team ta remarca cu pa mantene e standardnan aki, Directie Luchtvaart ta rekeri recurso financiero como tambe humano. Trainingnan cu lo mester tuma luga y cu ta tuma hopi tempo, pesey ta di suma importancia pa inverti den profesionalnan cu tin e capacidad pero tambe pa retene e profesionalnan aki, pa asina por sostene e sistema. Otro puntonan di atencion ta regulacion, guia di siguridad cu mester ahusta y tambe legislación cu mester reinforsa.

Delegacion ICAO (Organisacion Internacional di Aviacion Civil) a bishita Departamento di Aviacion Civil di Aruba (Directie Luchtvaart Aruba).E posibel audit cu lo ta tumando luga, ta aporta na hisa Aruba su clasificacion internacional na uno mas halto, cu ta habri oportunidadnan economico den e sector di aviacion. Oportunidadnan cu ya for di basta tempo caba tin e potencial pa utilisa na beneficio di Aruba su sector di aviacion.

Gobierno di Aruba y Directie Luchtvaart ta tumando pasonan pa haci tur esaki posibel. Un di nan ta pa haci e departamento autonomo di gobierno. Esaki ta habri oportunidad pa e departamento por funciona na un manera mas independiente y asina ta den posicion pa por genera entrada cu lo contribui na un miho siguridad di aviacion pa Aruba.

Minister Arends ta gradici e team di expertonan di ICAO y tambe coleganan di Sint Maarten cu a bin Aruba pa a participa den e sesionnan y asina colabora den hisa e nivel di siguridad di aviacion den Caribe.

Ta importante pa tambe menciona cu e bishita di ICAO na Aruba ta marcando historia door di ta e prome team di expertonan cu ta consisiti solamente di hende muhe. Sigur un logro remarcabel pa loke ta trata igualdad, diversidad y inclusion di genero.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options