Un NSS tin diferente beneficio pa un pais y ta produci estadistica oficial pa un audiencia grandi: publico en general local y internacional, sector priva, mundo academico, studiantenan, parlamento y gobierno.
Pa por implementa e NSS, mester di un ley amplio. Den cuadro di esaki Conseho di Minister a aproba un acuerdo di trabou cu un compania legislativo Hulandes pa yuda Aruba traha e ley pa e NSS. Pa e proceso cana bon a kies un compania pa haci e trabao aki mirando cu Directie Wetgeving en Juridische Zaken tin hopi trabao ta haciendo y crea e ley pa e NSS ta un trabao grandi pa cual experticio specifico ta rekeri.
A tene un destaho y a invita tres compania pa duna un oferta pa traha e concepto di ley di NSS. For di e tres compania a scoge esun cu e mihor oferta. E compania lo cuminsa cu e trabao y lo traha hunto cu Directie Wetgeving en Juridische Zaken. E intencion ta pa entrega e concepto di ley di NSS pa fin di september na Raad van Advies.
E NSS ta un cooperacion entre Oficina Central di Estadistica y otro productor di estadistica oficial cu e meta di garantisa produccion di un gran variedad di estadistica oficial di calidad halto, relevante y actual pa asina esaki por forma e fundeshi di formulacion y evaluacion di maneho y di desaroyo sostenibel.
“NSS ta un tool importante pa tur hende, tanto den su rol pa e ciudadano y tambe den rol profesional. Datos confiabel ta importante pa tin un pueblo bon informa. E NSS lo contribui tambe na bon gobernacion por medio di maneho mas responsabel: ora gastonan di gobierno tin datos confiabel como base, e fondonan di gobierno ta wordo uza mas efectivamente.
Esaki ta evita malgastamento di fondo di gobierno, dus mas reduccion di gasto”, minister Wever a comenta.
Share this page