Durante e siman aki lo enfoca riba solucionnan pa un desaroyo duradero den cuadro di e metanan di Desaroyo Sostenibel di Nacionnan Uni (SDGs) pa 2030.
Innovacion ta importante pa crecemento economico y prosperidad di un pais.Tecnologia y idea nobo ta mehora producto, servicio y procesonan nobo cu ta beneficia un sociedad. Importante ta pa comunidad participa den e desaroyo innovativo di nos pais.
E aña aki, gobierno ta dedica e siman di 28 di october pa 1 di november2019 como e Siman di Innovacion, ‘Immerse Aruba Innovation Week’, unda lo presenta e proyectonan innovativo cu ta tumando luga na Aruba
Esaki ta resultado di colaboracion entre diferente organisacion cu a coordina nan diferente evento pa crea un programa nacional. Fundacion FUTURA lo coordina y publica e diferente evento cu lo tuma luga.
Sector priva, NGO’s, sector publico, studiante, empresarionan y inversionista na Aruba lo tene discurso y tayer riba e topiconan relaciona cu innovacion, creatividad y entrepreneurship.
Prome Minister Evelyn Wever-Croes ta invita henter comunidad pa participa na Siman di Innovacion y forma parti di e discusion tocante sostenibilidad door di bishita e diferente evento cu lo tuma luga durante e siman aki rond di nos isla.
Siman di Innovacion ta habri pa tur hende participa. Por ehempel, un scol por participa door di organisa nan propio ora di Immerse durante Siman di Innovacion cu nan studiantenan. Nan por scoge un topico di innovacion, creatividad y sostenebilidad pa participa. Por entrega informacion di e evento na FUTURA via nan website of Facebook page p’asina por añadi e evento na e calenderio di evento.
Pa mas informacion, por bishita e website https://immersearuba.org pa tira bista riba e programa y pa mas informacion tocante participacion na siman di innovacion.
Share this page