Hunto pa Derecho di Mucha den Reino

Den e acuerdo di colaboracion aki, 7 punto ta para central: educacion positivo, prevencion di maltrato di mucha, desaroyo di “safetynets” (contenido pa tempo liber despues di scol), participacion di mucha y hoben, asistencia profesional, sosten di mucha y famianan y atencion special pa muchanan vulnerabel. E MoU ta bira realidad despues di un declaracion di intencion cu 7 mandatario a firma na Corsou, durante e di tres conferencia di e Taskforce di Reino encarga cu derecho di mucha.

For di seis rapport di Unicef titula “Muchanan den Reino: derecho di mucha den Reino Hulandes”, a sali na cla di forma convincente cu medidanan adicional ta sumamente necesario, pa por mehora derecho di mucha na e seis islanan cu tabata forma Antias Hulandes. Colaboracion y comparti conocimento entre e isla y paisnan den Reino ta esencial pa por logra esaki.

Durante e Conferencia di Reino di 2 di april 2014 na Aruba, mandatarionan a reitera cu cada mucha den Reino tin derecho riba un bon infancia y hubentud, manera e Tratado Internacional tocante Derecho di Mucha (IVRK pa su abreviacion na hulandes) ta stipula.

Tambe durante e conferencia a dicidi pa institui e Taskforce di Reino encarga cu Derecho di Mucha, cu tin como tarea pa stimula colaboracion den Reino riba tereno di derecho di mucha.

Despues durante conferencia di e Taskforce, cu a tuma luga di 14 pa 16 di mei 2018 na Corsou, mandatarionan responsabel pa mucha y famia di e cuater paisnan y tres entidadnan publico den Reino, a firma un declaracion di intencion. Esaki a conduci na firmamento di e MoU, cu Reino a publica riba Dia Internacional di Derecho di Mucha.

Den Memorandum of Understanding por haya mas informacion.