Hulpbestuurskantoor San Nicolas a habri bek pa sirbi e pueblo di San Nicolas y bisindario

Bishitantenan di HBK San Nicolas a ricibi servicio den un establecimento mas nobo, moderno y cu ta cumpli cu tur e normanan y standardnan necesario.

Riba 31 di october 2022 mester a cera e localidad anterior di Hulpbestuurskantoor San Nicolas pasobra e no tabata adecua mas pa esnan cu tabata traha eynan, y tampoco pa ricibi bishitante. Mientrastanto mesora gobierno a cuminsa traha pa e re-apertura di HBK San Nicolas den un otro localidad, cual awe ta un realidad.  

Prome Minister Evelyn Wever-Croes a indica cu pa yega asina leu no tabata facil, pa motibo cu e proceso di muda un departamento di gobierno por tuma hopi tempo, sinembargo den e caso aki el a dura dos luna y mei. Den e periodo aki, e trahandonan di HBK San Nicolas a traha na Savaneta.  

E localidad ta uno temporal pa HBK San Nicolas mientras cu ta bay renoba e edificio unda cu tabata ubica anteriormente. Unabes cu e edificio ta remodela, e idea ta cu lo percura pa ubica mas departamento tambe aden. Entre otro Sociale Zaken, Dimas, AZV, Enseñansa pa Empleo, y lo tin espacio pa otro tipo di desaroyo eynan tambe. 

E trabounan aki no a cuminsa ainda, pa motibo cu tin retraso den e plannan. E ultimo plan cu a wordo presenta cu ta encera cu ta pasa e trabou pa SOGA desaroya e MFA, no por a continua.  E consehonan a bin negativo pa motibo cu SOGA lo hisa e prijs di e MFA nan existente, cual ta pone un peso mucho mas grandi riba e presupuesto. DOW ta trahando riba un otro alternativa caminda cu Gobierno mes lo pone fondo disponibel pa remodela e edificio y e ora ey no mester paga tanto aña na huur manera ta e caso cu e otro MFA nan. Den e siguiente simannan lo concretisa esaki.

Prome minister Wever - Croes a gradici tur esnan cu a haci e proceso posibel, specialmente e trahandonan di HBK San Nicolas y ta considera e edificio di HBK hopi importante den San Nicolas. Unabes cu realisa esaki  e lo ta un catalisator di desaroyo di centro di San Nicolas. Banda di otro tipo di desaroyonan cu lo bin den caya principal di San Nicolas, Seroe Colorado y den henter e area.