Hulanda lo duna 10.9 miyon florin pa yuda Gobierno di Aruba enfrenta e crisis. Na e mesun momento, a haci e anuncio aki na Hulanda tambe.
Na luna di mei pasa, Hulanda a indica cu e ta dispuesto pa yuda Aruba y Corsou atende cu e crisis di Venezuela cu 23.8 miyon Euro cu ta alrededor di 55 miyon florin. Un gran parti di e 55 miyon florin Hulanda lo uza pa e mes yuda nos, y pa loke ta trata e otro parti, Aruba y Corsou mester a entrega nan lista di plan y proyecto.
E 10.9 miyon florin aki ta bay pa fortifica Aruba como pais, den haci Aruba mas sigur p’asina atende cu e crisis miho posibel. E ta pa yuda Aruba controla nos frontera miho p’asina nos percura pa domina e crisis cu nos tin internamente.
Control riba lama y tera lo bira mas estricto p’asina evita importacion ilegal di sustancia, arma como tambe persona. E tema di mensenhandel y mensensmokkel (traficacion di hende) ta un problema serio cu ta tumando luga demasiado hopi den nos region. Pa combati esaki lo inverti den ampliacion di Kustwacht, pa patruya nos awa y asina evita importacion ilegal, y transporte ilegal di hende.
Tambe cu parti di e placa aki lo amplia capacidad di detencion na unda esnan ilegal por keda mientras nan ta warda e fecha pa manda nan bek nan pais. Esaki den e tempo aki ta hopi importante y necesario mirando e fluho di ilegalidad na Aruba a aumenta. Ampliacion di e capacidad di detencion lo trece mas trankilidad.
Lo uza parti di e fondo aki tambe pa enseñansa temporal, pa mucha cu ta bin for di Venezuela cu no por drenta nos scolnan, pa garantisa cu nan ta haya educacion durante e tempo cu nan ta na Aruba. Asina evita cu nan ta bira un peso pa comunidad y evita mas problema social.
Ta bon pa remarca si, cu e placa aki lo no ta disponibel pa crea vivienda of cubri otro gastodi persona cu ta bin haci peticion di asilo. Tampoco por uza e placa pa cubri gasto di operacion di Gobierno. E placa aki ta bay pa fortifica Aruba como pais, den haci Aruba mas fuerte y mas sigur, y asina por atende cu e crisis miho posibel.
Share this page