Hospice Atardi ta celebra su di 4 aniversario

Na Hospice Atardi ta ofrece cuido den ambiente di hogar. Un team di boluntario, enfermero y dokter di cas ta duna cuido y sosten na personanan cu un malesa severo pa cual no tin cura mas y cu a yega nan etapa final di bida. 

Na hospice tin cuido 24 ora pa dia. E boluntarionan cu ta yuda cu cuido personal ta haci loke famia na cas tambe lo haci por ehempel compaña e huesped, yuda cu su cuido personal diario, scucha y combersa cu e huesped y tambe cu su famia y tambe t’ey pa e huesped na momento cu su pareha, famia of amigo no por t’ey.

Hospice Atardi no lo por ta un realidad sin e enfermera/o cu ta traha tur dia eynan pa duna cuido y guia. P’esey ta gradici tambe tur persona cu ta haci trabou di boluntario. “Emocionalmente e ta un trabou hopi pisa y ta pisa hopi riba cada un di e personanan cu ta duna e cuido aki, asina ta danki pa e esfuerso”, Minister Oduber a remarca.

Tambe minister Oduber y Arends ta gradici cada un persona cu ta haci Hospice Atardi un realidad y kier dunanan pabien un biaha mas cu nan di cuater aniversario. Cualkier persona cu tin interes pa haci trabou di boluntario por pasa na e hospice  na Noord Cura Cabai 147 of yama 5840085.