Dit item is gearchiveerd op 18-03-2022.
Desde october te na final di december 2021, RCC Aruba a participa den un tour dunando presentacion na Budapest, Hungria. Na januari 2022, e grupo di acrobata a participa na un competencia internacional di Circo ‘Budapest Circus Festival’ cu ta e di tres competencia internacional di Circo mas reconoci rond mundo.
RCC Aruba a cosecha hopi exito durante e Circus Festival na Hungria y a gana e tercer premio di brons. Esaki ta un logro masha grandi, ya cu pa e prome biaha cu e acrobatanan a competi cu artistanan di Circo di paisnan grandi manera Italia, Rusia, Mexico, Hungria Spaña, Etiopia, Cuba y Ucraina. Ademas di e premio di brons, RCC Aruba a gana e Premio Special. Esaki ta un premio cu un famia di gran renombre den e mundo di Circo ta duna na e Grupo di Acrobatanan cu a gosa di mas admiracion di e publico.
RCC Aruba a ricibi oferta di Circonan internacional renombra pa presenta den varios pais rond mundo. Na luna di juli RCC lo biaha pa Inglatera, pa duna presentacion na Hippdrome Circus pa un temporada di tres luna. Despues na luna di september nan lo participa na un otro Festival di Circo Internacional. Na october e acrobatanan lo duna presentacion na Paris, Francia den Bouglione Circus, cu ta un Circo cu e unico yiu di Napoleon Bonaparte Napoleon III, cu ta Principe Louis-Napoléon, a inaugura. RCC Aruba ta representa Pais Aruba durante di tur nan presentacion y ta carga nomber di Pais Aruba cu hopi orguyo.
Na nomber di Gobierno di Aruba y henter pueblo di Aruba, Minister Xiomara Maduro y Minister Dangui Oduber a felicita e hoben artistanan y a gradici Sr. Diego Emilio Garzon Sierra, sr. Juan Camilo Aguillon, sr. Jhon Freddys Badillo, sr. Juan Felipe Marin Rios y na e directornan sr. Diego Jaramillo Ospina y sra. Yamila Hernandez Ramirez pa e tremendo trabou cu nan ta haci promoviendo Aruba internacionalmente.
Share this page