Gobierno ta subraya e necesidad di un framework robusto di indicadornan pa traha pa un desaroyo sostenibel

Aruba a organisa su mes y a instala un Comision Nacional di SDGs pa duna dirigi y coordina e implementacion di SDGs na Aruba. Siguientemente a instala e SDG-Indicator Working Group pa guia y coordina e proceso di monitoreo y evaluacion di SDGs. Tambe pa trece dilanti puntonan di atencion relaciona cu disponibilidad di data pa SDGs.

E SDG-Indicator Working Group ta un colaboracion entre departamentonan gubernamental y semi-gubernamental. E werkgroep ta existi desde aña 2017. Den transcurso di aña a haci diferente trabounan relaciona cu produccion di indicadornan pa yuda cu e proceso di desaroyo, monitoreo y evaluacion di maneho pa desaroyo sostenibel.

E SDG-Indicator Working Group a produci un rapport “Aruba Sustainable Development Goals Indicators 2021 – A report on new baselines and time series analysis”.

E meta di e rapport ta pa presenta indicadornan nobo cu a produci (nieuwe nulmetingen/baselines) y analisis di indicadornan desde aña 2000 (den caso cu data ta disponibel). Esaki ta pa yuda funcionarionan di maneho y “decision makers” monitorea desaroyo di diferente area di desaroyo sostenibel y formula metanan nacional concreto pa sigui traha riba implementacion di SDGs.

E trabou haci ta curasha mas analisis den profundidad ser y ta yuda prepara  Aruba pa e “Voluntary National Review 2022” di Nacionnan Uni unda paisnan ta presenta nan progreso den implementacion di SDGs.

 “Como Minister di Desaroyo Sostenibel, mi ta curasha trabounan cu ta aporta na desaroyo sostenibel”. “E rapport ta duna un representacion di desaroyo di Aruba relaciona cu areanan di desaroyo sostenibel. Mi ta curasha pa mas analysis y investigacion wordo haci.” Data ta sumamente importante pa na Aruba nos planea di manera adelanta y riba termino largo, haci uso efectivo di nos recursonan limita y evalua e resultado di nos plannan y maneho di manera obhetivo y asina avansa desaroyo sostenibel na Aruba".