Gobierno ta conmemora dos aña di covid-19 na aruba y ta recorda ciudadanonan cu a fayece cu covid durante e periodo aki

Pa e motibo aki, Gobierno di Aruba, hunto cu CrisisTeam a tene un ceremonia solemne na Bestuurskantoor pa asina conmemora e hecho aki y especialmente pa recorda e victimanan cu a fayece cu Covid-19 durante e periodo aki. ‘Den Union pa Recorda y miho Speransa pa Futuro’.

Presente na e ocasion tawata Presidente di Parlamento, señor Edgard Vrolijk, miembronan di Parlamento, Prome Minister Evelyn Wever-Croes, Minister di Salubridad Señor Dangui Oduber y demas ministernan, Secretario di Conseho di Minister señora Grace Koolman, Rino Hermans di CrisisTeam, Sharline Koolman di DVG, Ronella Croes di Ata, Vanessa Tjon-Kock y demas invitadonan cu a acudi na e yamada pa atende e acto solemne aki.

Na e ocasion a hiba palabranan Prome Minister, señor Rino Hermans, señora Sharline Koolman, señora Ronella Croes y Minister Dangui Oduber. Tur a menciona con a maneha e crisis durante dos aña y con a logra pa awe Aruba ta recuperando di e pandemia aki.

Despues di e discursonan, a tuma luga un ofrenda floral pa despues tuma tambe un minuut di silencio pa tur esnan cu a fayece cu Covid den e dos añanan tras di lomba.

Na final a cende e luz di speransa como un simbolo pa ilumina Aruba.