Gobierno di Aruba ta nombra srta. Thessaly Zimmerman como “Embahadora di Bon Boluntad di Pais Aruba"

Den presencia di Minister Presidente Evelyn Wever-Croes y demas minister y invitado di srta. Thessaly Zimmerman, Minister di Cultura Xiomara Maduro den nomber di Gobierno di Aruba a nombra srta. Thessaly como Embahadora di Bon Boluntad di Pais Aruba.

Thessaly a sa di representa Aruba dignamente riba e tarima internacional di beyesa y a logra yega den e Top 10 finalista. E la demostra cu aunke con chikito Aruba ta, cu determinacion, disiplina, fe y cu un actitud humilde, nos yiunan di tera por yega hopi leu. Esaki sigur ta un ehempel pa inspira mas hoben pa traha duro pa logra nan metanan. Ta importante pa nos para keto tambe na e trabao cu Thessaly a haci pa hiba su mensahe pa un bon salud mental. Sigur despues di un pandemia cu a azota mundo, e mensahe pa nos ta mas consciente di nos salud mental, ta uno importante.

Despues di 25 aña, un particpante di Aruba alogra top 10 y danki na Thessaly miyones por a haya sa mas di Aruba y esaki ta un promocion impagabel pa nos isla. Thessaly a sa di carga un responsabilidad grandi y a demostra cu su caracter humilde di ta un digno representante di Aruba.

Pa tur locual ela haci y nos ta sigur cu Thessaly lo sigui haci pa Pais Aruba, Gobierno di Aruba ta gradici Thessaly ta reconoce como Embahadora di Bon Boluntad di Pais Aruba.