Den cuadro di esaki, gobierno di Aruba y tambe di parti di Ministerio di Integridad, Minister Ursell Arends ta decreta e siman di 5- 9 di december como Siman Nacional di Integridad.
E Siman Nacional di Integridad di e aña aki (di 5 pa 9 di december) tin como lema "Honra bo compromiso cu integridad".
Tur aña rond di 9 di december, lo tin un siman largo di campaña di conscientisacion pa promove integridad den tur asuntonan di estado y sociedad y e lucha contra corupcion.
E obhetivo ta pa enfoca riba e derecho y responsabilidad di tur hende, incluyendo mandatarionan, funcionarionan, agentenan di ley, medionan di comunicacion, sector priva, sociedad civil, mundo academico, ciudadanonan, mucha- y hobennan, den promove integridad y e lucha contra corupcion. Pues ta enfoca pa tur hende, sea hoben of adulto mayor, tin un rol den preveni y lucha contra corupcion pa asina Aruba por ta un pais resiliente y por promove integridad na tur nivel den sociedad.
Den e siman di conscientisacion lo organisa diferente seminario en cuanto integridad y bon gobernacion (Good governance). Lo organisa actividadnan den scol pa educa nos muchanan y hobennan riba integridad y tambe lo comparti varios informacion via medionan social encuanto integridad y preveni corupcion.
Nos lo culmina e siman cu un caminata organisa pa comunidad, Walk for Integrity, Walk for Nature. E caminata lo tuma lugar den parke Arikok, riba diabierna 9 di december cuminsando pa 4.30 di atardi.
Share this page