Gobierno di Aruba a institui un comision nacional y multi disciplinario pa dialoga riba e reforma den sector di cuido.

ORANJESTAD - Manera ta conoci for di aña pasa riba instruccion di Hulanda, pais Aruba mester a corta 5 miyon florin pa luna den cuido den pleno pandemia.

Hulanda a pone como condicion pa corta den sector di cuido pa asina Aruba por a ricibi e di 2 tranche, garantizando pago na empleadonan publico, fase, loonsubsidie, duna sosten financiero na companianan y tambe garantisa cu fondonan di AZV y SVb ta keda stabiel.

Te dia di awe Hulanda no por a argumenta of substancia con nan a yega na e recorte di 5 miyon florin pa luna. Ministerio di Salubridad Publico ta hopi preocupa cu e recorte aki pa motibo di e consecuencia nan cu esaki por tin pa bida di hende. Ministerio di Salubridad Publico ta haciendo tur cos den su alcance pa convence Hulanda pa permiti Aruba espacio pa por atende cu e reformanan den cuido hunto cu e sector menciona. Pa es motibo aki Gobierno di Aruba a institui un comision nacional y multi disciplinario cu lo bay, evalua y investiga e situacion den sector di cuido pa asina crea e miho manera pa reforma nos cuido medico, garantisando cu e fondonan di AZV ta keda sostenibel.

E comision lo tin diferente tarea  y den e dianan venidero lo elabora riba esakinan.

E comision menciona ta consisti di representanenan di Hunta di Directiva di Stichting Ziekenverpleging Aruba, Instituto Medico San Nicolas, FSMA Respaldo, Stichting Algemene Bejaardenzorg Aruba (SABA), Asociacion di dokternan di cas (HAVA), Asociacion di Specialistanan Medico, Asociacion di Boticanan, Asociacion di fisioterapistanan, Asociacion di specialistanan di Hospital, Aruba Dental Society y Asociacion di Parteranan.

Mientrastanto Gobierno di Aruba a pidi Hulanda pa para e recorte den sector di cuido medico y ta pendiente un reaccion di Hulanda.  

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options