Pa Gobierno di Aruba e proyecto “Veilige Barios” ta sumamente importante pa desaroyo di pais Aruba y por lo tanto a aloca fondo adicional pa por ehecuta e proyecto aki. Gobierno tambe a acerca Cede Aruba como partner strategico mirando cu nan meta primordial ta pa trece recurso hunto y percura pa desaroyo sostenibel. Tambe a acerca e Centro di Barionan ya cu e proyecto aki ta pa amplia e actividadnan den bario pa asina crea mas oportunidad pa e ciudadanonan den e diferente barionan di Aruba.
Prome Minister Evelyn Wever-Croes tambe tabata presente na momento di firma e MOU y a expresa di ta sumamente contento cu realisacion di un proyecto asina importante pa Aruba su desaroyo. Specialmente mirando cu e proyecto aki lo beneficia esnan cu mas a keda afecta durante e pandemia di Covid-19, cu ta e muchanan, nos grandinan y e hende muhenan.
Den nomber di gobierno di Aruba, Prome Minister a gradici tur esnan presente pa nan colaboracion y cooperacion pa Aruba por a yega na un proyecto asina bunita. El a gradici specialmente Minister Rocco Tjon pa a logra haci e poyecto di “Veilige Barios” un realidad, pero tambe Minister Endy Croes y Minister Ursell Arends cu a colabora cu fondo di nan ministerio pa haci e proyecto aki posibel.
Por ultimo, a gradici Cede Aruba cu semper, na momento cu gobierno acerca nan, sa di coordina e esfuersonan den un forma constructivo y positivo. “Mirando e pasion cu boso tin pa boso trabou, mi tin tur confiansa cu e proyecto aki lo ta un exito” Prome Minister a termina bisando.
Share this page