Lo utilisa e framework den cuadro di colaboracion di Nacionnan Uni den e region, incluso Aruba pa e proximo cinco añanan, sostene paisnan pa recupera y reconstrui di e pandemia di COVID-19, y tambe eherce trabounan riba tereno di desaroyo sostenibel sin laga ningun hende atras.
E firmamento a tuma luga riba 11 di februari door di Prome Minister di Aruba Evelyn Wever - Croes y sra. Marina Walter cu ta Resident Coordinator di Nacionnan Uni, durante un ceremonia hybrid (ceremonia virtual combina cu den persona) entre UN House na Trinidad y Tobago y Gobierno di Aruba y conseho di Minister di Aruba.
Sra. Walter y varios miembro di UN Country Team a felicita Gobierno di Aruba pa e contribucion substancial na e proceso di diseño di e asina yama “Cooperation Framework” y pa enforsa y continua cu lasonan cu Nacionnan Uni.
Den e ceremonia sra. Walter a bisa: “E Cooperation Framework ta representa un era nobo di cooperacion entre UN y Caribe y ta provee un fundeshi solido riba cual por sigui sostene Gobierno di Aruba den su obhetivo pa logra metanan di agenda 2030 y e Metanan Mundial pa un Desaroyo Sostenibel (SDGs). ”
Prome Minister Wever - Croes na su turno a expresa cu Aruba ta comprometi na logra e metanan di desaroyo sostenibel y ta warda cu anticipacion pa implementacion di e framework, agregando cu Gobierno di Aruba ta entusiasma pa sigui den e rumbo pa bira un Pais mas resiliente.
E MSDCF ta identifica 4 aspecto cardinal como e prioridadnan pa logra desaroyo sostenibel den e region:
- Aumento di sosten pa e agenda di resiliencia economico;
- esfuerso mas intensivo pa sigura realisacion di derechonan humano pa un y tur;
- gran compromiso pa aumenta inclusivididad den reduci riesgo pa disaster y adaptacion pa cambio di clima;
- aumento di sosten pa sigura cu sociedadnan den Caribe ta keda sociedadnan cu ta biba den paz y unda trankilidad ta reina.
UNDP, UNEP, UNFPA, UN Women, IOM, PAHO/WHO, UNDSS, UNIC, FAO and ILO tambe a participa na ceremonia di firmamento.
Share this page