Gobierno a anuncia maneho nobo pa e ranchonan na costa y riba rif

E maneho vigente ta keda existi, pero loke ta bin acerca cu no ta pas mas den e reglamentacion, no por keda.  

Meta di e maneho aki ta pa:

• Control y vigilancia. E ta necesario pa regula loke ta pasando cu e casitanan aki pa cual ningun hende ta para responsabel. Hopi biaha tin hopi sushi rond di nan, ilegalidad y acto inmoral ta tuma luga den nan. Cu e proceso cu ta cuminsa cu ne, esnan cu ta acepta cu e casita ta di nan lo haya un permiso pa esaki y lo mester para responsabel pe tambe; 
• Pa evita cu e cantidad ta sigui aumenta.

Cu e maneho nobo, no ta permiti pa construi mas di e casitanan aki. Pa medio di imagen di satelite lo controla anualmente e cantidad di casita cu tin y si a bin mas acerca. E casitanan cu bin despues di awe lo kita nan. Tampoco ta permiti pa amplia e casitanan existente. 

Gobierno ta duna 2 luna pa esun responsabel registra na DIP y ta permiti solamente pa persona registra (no negoshi). Alabes ta enfatisa cu e casitanan ta pa uzo recreacional y no residencial

Segun DIP a indica cu un di e puntonan di salida di e ROP cu a keda introduci e aña aki ta cu locual ta existente ta keda existi, y locual cu ta bin acerca cu no ta pas mas den e reglamentacionnan, lo kita

Den cuadro di e ROPV cu ta den tratamento, e aspecto di regulacion di tereno ta hopi importante. Por constata cu specificamente den tereno di naturalesa tin hopi di e casitanan crioyo ubica. Ultimamente DIP ta haya keho cu e casitanan ta aumenta mas y mas. Gobierno ta reconoce cu e casitanan aki tin balor tradicional cultural, p’esey e maneho lo percura pa esnan cu tey sigui existi,  pero teniendo na cuenta e aspecto sostenibel tambe cual Gobierno ta para pe.