Gobernador ta bishita cas di cuido pa nos grandinan H.O.P.E.

ORANJESTAD - Riba diabierna mainta 19 di juni, Gobernador di Aruba, S.E. Alfonso Boekhoudt, a haci un bishita di trabou na e luga di cuido H.O.P.E. (Helping Our Precious Elderly) na Tanki Leendert.

Gobernador ta bishita cas di cuido pa nos grandinan H.O.P.E. Gobernador a combersa durante su bishita cu entre otro e director, trahadonan, como tambe e dokter di cas fiho di e fundacion H.O.P.E , unda nan a informa Gobernador con nan ta enfrenta e retonan cu e situacion di crisis ta trece cune.  

Gobernador ta bishita cas di cuido pa nos grandinan H.O.P.E. E luga di cuido ta conta cu 19 habitante y nan tin un permiso oficial pa por opera un cas di cuido. Den colaboracion cu Inspectie van Volksgezondheid, H.O.P.E. a implementa varios forma di traha cu por considera como un ehempel pa e sector di cas di cuido particular. Asina nan ta traha cu un dokter di cas fiho pa tur habitante, pa promove e calidad y continuidad di cuido door di dokter di cas. Ademas nan a desaroya un protocol pa un reglamento pa bishitante, cu e protocol nacional pa bishitante, cu ta na vigor actualmente,  pa un gran parti ta basa riba dje.  Tabata di sumo importancia pa e cas di cuido pa reanuda bishita na un forma responsabel, pasobra un parti di e habitantenan tabata sufri di e consecuencia mental, door di e prohibicion pa haya bishita di nan sernan keri.

E compromiso y dedicacion di e trahadonan ta hopi grandi. Un parti di nan a keda biba na e cas di cuido boluntariamente pa asina preveni cu e personal eventualmente por contagia e habitantenan cu e virus COVID-19. E personal riba nan mes a bay den cuarentena, door di preocupacion pa nan clientenan. Gobernador a expresa su aprecio pa e dedicacion grandi di e trahadonan.

Pa medio di e combersacionnan y, si ta posibel, bishitanan di trabou, Gobernador Boekhoudt ta informa su mes tocante e consecuencianan di e brote di coronavirus y ta expresa su apoyo y aprecio pa e esfuerso di hopi persona den e lucha contra e pandemia. Ta tuma medida, den consulta cu e organisacionnan involvi, pa asina e bishitanan di trabou por tuma luga na un manera sigur.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options