Gobernador di Aruba ta inicia cu ronda di consulta

Dit item is gearchiveerd op 28-07-2021.

ORANJESTAD - Gobernador di Aruba, Su Excelencia Alfonso Boekhoudt, riba dialuna 28 di juni 2021 durante oranan di mainta ta inicia e rondanan di consulta cu e organonan di conseho y cu lidernan politico.

Durante di e rondanan di consulta Gobernador ta informa su mes tocante e posibilidadnan pa formacion di un gabinete nobo, teniendo na cuenta e resultado di e eleccion pa miembronan di Parlamento di Aruba.

Edificio Gabinete Gobernador ArubaGobernador Boekhoudt primeramente lo papia cu presidente di Raad van Advies, señor Frits Goedgedrag y despues cu presidente di Parlamento, señor Juan Thijsen. For di dialuna merdia Gobernador lo papia cu e lidernan di e partidonan politico cu a base di e resultadonan electoral preliminar a haya por lo menos un asiento: señora Evelyn Wever-Croes (MEP), señor Mike Eman (AVP), señor Ursell Arends (RAIZ), señora Marisol Lopez Tromp (MAS) y señor Miguel Mansur (Accion21). Seguidamente Gobernador lo consulta cu presidente di Sociaal Economische Raad, señora Tisa LaSorte, cu presidente suplente di Algemene Rekenkamer, señor Frederick Nuboer y cu e miembro postula pa Aruba di College Aruba financieel toezicht, señora Hellen van der Wal.

E consultanan ta forma e comienso di e proceso di formacion pa yega na un gobierno nobo pa Aruba. Ta spera cu e consultanan ta finalisa riba diaranson 30 di juni. E siguiente paso den e proceso di formacion ta cu, a base di e resultado di e consultanan, lo designa un informador y lo formula e encargo pa e persona en cuestion.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options