Frontier Airlines ta un realidad na Aruba

ORANJESTAD – Riba 20 di november 2021 Frontier Airlines tabata tin su vuelo inaugural na Aruba.

Minister di Turismo y Salud Publico Sr. Dangui Oduber y delegacion di AAA y ATA a yega Aruba riba e vuelo aki for di Miami.

Ya pa hopi tempo caba Ministerio di Turismo y e team di Aruba Airport Authority tabata den negociacion pa por a yega na un acuerdo cu Frontier Airlines, pa e vuelo inaugural aki.

Vuelo inaugural Frontier AirlinesVuelo inaugural Frontier AirlinesFrontier Airlines su base ta na Denver, Colorado y nan lo ta uzando Miami como un hub pa bin Aruba. Nan tin mas di 100 ruta di cual 30 ruta ta conecta cu Aruba. Awor nos localnan por haci uzo di e servicionan di Frontier Airlines y bula na un manera mas economico. Segun e mandatario esaki ta cuadra cu e vision cu gobierno tin pa diversifica mercado den e mercado grandi na Merca y no ta descarta cu pronto por tin vuelo directo for di Denver.

Minister Oduber a menciona cu e cifranan di turismo cu ta proyecta pa aña 2022 ta mustra hopi positivo. E cantidad di asiento disponibel pa aña 2022 ta mustra cu lo surpasa esun di aña 2019 cu tabata un aña record pa Aruba su turismo. E vuelo inaugural aki ta demostra e confiansa cu Frontier Airlines tin den Aruba como pais. Apesar cu mundo ta pasando den temponan dificil door di e pandemia, toch Frontier Airlines a tuma iniciativa y a dicidi di habri e ruta nobo aki di Miami pa Aruba.

Vuelo inaugural Frontier AirlinesVuelo inaugural Frontier AirlinesFrontier Airlines ta e aerolinea mas “green” di Merca actualmente. Nan ta enfoca hopi riba cuida y proteha naturalesa. Nan tin un flota di 100 avion nobo di Airbus A-320 Neo den nan servicio. E avionnan aki ta uza menos carbon den comparacion cu otro avion jet. Segun Minister Dangui Oduber gobierno su vision y maneho ta basa riba turismo sostenibel y Frontier Airlines su filosofia ta cuadra cu esaki.

Cada un di e avionnan di Frontier Airlines tin un diseño diferente na e rabo di avion. Cada un tin un pintura riba e rabo di diferente animalnan cu ta protehi. E pintura nan aki ta sirbi pa educa nos riba e animal mamifero of parhanan cu ta core peliger di extincion. Aruba tambe ta compitiendo pa tin su mesun parha riba un di e avionnan di Fontier Airlines. Lo anuncia e ganador di e ecompetencia aki na januari 2022. Aruba ta competiendo cu un pintura cu yama “Kiki e Prikichi”.

Minister Oduber kier a gradici partnersnan AAA (Air Service Development) y ATA, y tambe tur otro partner pa e logro aki.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options