A reuni cu e bestuur di e Tourism Product Enhancement Fund (TPEF), conhuntamente cu minister di Turismo, Sr. Dangui Oduber y Minister di Naturalesa Sr. Ursell Arends, pa asina cuminsa fiha e posibilidad cu TPEF por contribui na e proyecto, asina dunando esaki un kick-start.
Manera conoci, renobacion di e planta RWZI na Bubali ta sumamente necesario tumando na cuenta e daño cu e awa sushi na Bubali Plas ta ocasionando e flora y fauna, specialmente bida marino den e area.
Pa e motibo aki a bin cu e proposicion pa mehora e capacidad pa trata e awa, y tambe expande e wetlands pa asina tin un filter biologico mas amplio, asina conoci como e “Western Wetlands Project”.
Alabes ta reconoce e gran potencial pa actividad economico den e plan aki di Western Wetlands. Den e proceso di crea un eco-sistema mas vibrante, tin potencial pa haci e proyecto aki parti di nos producto turistico, pues sigurando su factibilidad.
Gobierno ta pone prioridad pa crea harmonia entre nos naturalesa y nos unico pilar economico, cu ta turismo. Pa e motibo aki Ministerio di Naturalesa, Fundacion Parke Nacional Aruba y Aruba Birdlife Conservation a cuminsa e iniciativa pa busca fondo pa haci e proyecto un realidad.
E proyecto ta encera e cinco saliñanan parti pabou di nos isla cu ta:
- Saliña Bubali;
- Saliña Palm Beach;
- Saliña Cerca;
- Saliña Malmok;
- Saliña Druif.
Ta spera cu pronto por mira e proyecto aki bira realidad. E no solamente lo brinda un solucion pa e maneho di desperdicio di awa di riool, pero tambe lo crea un eco-sistema vibrante caminda naturalesa y ciudadanonan por gosa di dje.
Share this page