Fondo di subsidio Europeo Erasmus + ta brinda oportunidad di mobilidad y cooperacion den educacion secundario professional

ORANJESTAD - Oficina di Relacionnan di Unión Europeo y di Reino (BEUK) ta informa cu e Programa Europeo di Subsidio Erasmus + ta ofrece diferente oportunidad na studiante y profesional riba diferente nivel di educacion, pa por medio di subsidio, crea contacto cu institucionan di educacion na Europa, pa intercambia conocemento y ideanan y pa formula maneho nobo. 

E opcion di subsidio pa educacion secundario profesional (enseñansa profesional basico y enseñansa professional intermedio) ta dividi den dos linia di accion clave:

  • Accion clave 1 (mobilidad);
  • accion clave 2 (partner strategico).

Erasmus +E prome accion (KA1), proyectonan di intercambio y mobilidad, ta ofrece profesionalnan den educacion y studiantenan oportunidad pa adkiri conocemento y habilidadnan nobo den exterior. E di dos accion (KA2), cooperacion, tin como obhetivo pa fortalece educacion secundario profesional a traves di colaboracionnan chikito y na escala mas grandi entre institucion y organisacion den paisnan Europeo (cu excepcion di Hulanda). El 'plan di accion' presenta pa 2021-2027 ta pone enfasis ariba e temanan di inclusion, orientacion pa futuro, digital y duradero. E programa ta dirigi na e siguiente gruponan:

  • Studiantenan (cu ta inscribi na un scol profesional secundario of cu a gradua na un scol profesional secundario den e ultimo 12 lunanan);
  • personal di e scolnan aki;
  • docentenan y formadornan na e scolnan aki;
  • e scolnan mes;
  • organisacionnan di e scolnan.

Sinembargo, solamente un entidad huridico por haci un solicitud pa fondo bou di Erasmus+.

Union Europeo a publica un Guia di programa Erasmus +, cu ta duna splicacion y informacion esencial di e programa y un lista di oportunidadnan cu e programa ta cubri. Ta importante pa verifica stapnan pa yega na un peticion di subsidio, prome cu entrega esaki:

  • Logo Erasmus +Participa na reunionnan informativo over Erasmus +;
  • consulta e condicionnan y ‘deadline’ riba e website di Erasmus+;
  • cuminsa na tempo cu preparacion di bo peticio;n
  • dirigi e peticion na e impacto di bo Proyecto y implementacion di obhetivonan di Union Europeo;
  • busca socionan adecua;
  • uza documentonan corecto pa prepara un peticion corecto cu ta cumpli cu tur rekisito, disponibel ariba e website di Erasmus+; 
  • consulta e instruccionnan tecnico pa peticion di proyectonan;
  • entrega bo peticion na tempo;
  • informa bo mes riba e aprobacion di bo peticion y e stapnan cu mester tuma pa e implementacion di bo proyecto;
  • informa bo mes di e rechaso di bo peticion, siña di dje, y exito cu e siguiente peticion.

Na cualkier momento bo por comparti bo peticion cu Oficina di Relacionnan di Unión Europeo y di Reino para verifica si bo peticion ta cumpli cu e obhetivonan y maneho di Union Europeo. Ta entrega e peticion oficialmente na e Agencia Nacional a traves di e website di formulario Erasmus +. Ta prepara e formulario di peticion pa 2022 y otro documentonan relaciona actualmente y pronto nan lo ta disponibel ariba e website di e Agencias Nacional of di e Agencia Ejecutiva Europea di Educacion y Cultura.

Bo ta interesa? E proximo sesion informativo ta tumando luga diahuebs awor 18 november pa 9 am. Mester registra via www.erasmusplus.nl. Pa cualkier pregunta di e programa por comunica cu BEUK via telefon: 5834705 of email: info@arubagovernment.eu.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options