Fiesta di San Juan y Dera Gay 24 di juni (gearchiveerd)

Tin diferente version tocante e origen di e fiesta cu Aruba ta celebra como un fiesta nacional, cu ta data for di 1862. Den caso di e origen religioso ta referi na e nacemento di Juan Bautista y como fiesta cultural ta referi na e fiesta di cosecha. Como fiesta cultural, dia di San Juan ta mas conoci pa su musica, baile, cendemento di candela, cuminda tipico y bebida.
E colornan cu ta domina den e celebracion ta cora y geel. Cora ta e colo di candela cu antes e hendenan tabata cende dia 23 pa indica cu e dia despues ta dia di San Juan. E colo geel ta pa e mata di kibrahacha cu ta floria durante luna di juni.
Segun e tradicion e fiesta ta cuminsa dia 23 di juni ora cu e cunukeronan ta cende sobra di palo di maishi na candela y p’asina cuminsa prepara pa e temporada nobo di cosecha. E cendemento di candela ta manera un limpiesa pa despues cuminsa di nobo. Cu e tempo e cendemento di candela a sigui pero e hendenan ta kima sushi dia 24 di juni. Esaki tin su consecuencianan ya cu e ta un molester pa bisiñanan, ta causa daño na nos medio ambiente y ta extra trabou pa Bombero cu mester sali paga candela rond Aruba. Anualmente ta haci un peticion ariba e comunidad pa no cende candela pa motibo di e molesternan menciona. Dia 24 di juni, despues di bahada di solo, e fiesta di San Juan ta cuminsa den diferente districto cu baile di Dera Gay, baile di bula candela y baile di bandera. E baile di candela ta pa proteccion contra malesa y mala suerte. E baile mas conoci t’esun di Dera Gay, unda e hende homber cu su wowo tapa y c’un palo den su man mester purba mata e gay. Antes e bailamento ta tuma luga den sabana cu un gay bibo dera. Awendia ta uza sea un gay traha y e baile ta den club. Grupo TipicoEsunnan cu ta baila ainda den sabana of riba veld di tera ta uza un calbas.
Henter e baile ta tuma luga bou tocamento y cantamento di e cantica di San Juan. E instrumentonan musical mas uza ta fio, wiri, raspa y tambu. E cantica ta conoci for di 1862. Cuminda y bebida na abundancia tambe ta parti di e fiesta.
E fiesta di San Juan y Dera Gay a bira hopi popular atrobe despues di añanan setenta y awendia Departamento di Cultura ta bishita e scolnan pa duna informacion y demostracion di e fiesta y e baile. E fiesta ta parti di e calendario di celebracionnan cultural di Aruba manera Dande, Carnaval y Dia Nacional.