Exprodesk cu proyecto 'Empowered Women Exporters' pa empodera hende muhe pa haci negoshi di exportacion

ORANJESTAD – Exprodesk ta un unidad di Departamento di Asuntonan Economico, Industria (DEZHI) y comercio cu ta asisti y guia companianan local pa exporta nan producto y servicio.

Aruba su 'incubator' pa talento femenino

Particpante Proyecto “Empowered Women Exporters”Pa stimula economia di Pais Aruba, Exprodesk tin e proyecto ‘Empowered Women Exporters.’ Esaki ta un proyecto cu a cuminsa na december 2019 cu e meta pa empodera y guia e hende muhe na Aruba pa haci negoshi exportando nan producto y/of servicio. 

Incubadora special pa fomenta talento femenino

Un grupo di comerciante femenino cu a participa na e tayer di Exprodesk, 'From Zero to Hero, Mastermind - Empowered Women Exporters,' facilita pa sra Taiana Mora di Nex Consulting, a dicidi di forma un aliansa strategico pa intercambia conocemento y yuda otro cu diferente proyecto pa asina por exporta nan producto y/of servicio. Di e manera aki a nace un incubadora special pa fomenta e talento femenino di Aruba. E grupo di ‘Empowered Women Exporters’ ta consisti di sra. Valeria Gomez di Vadavas,  sra. Sharina Gumbs di Studio Gumbs, sra. Vanessa Hollander di PressPlay VDH Caribbean, sra. Virginia Rasmijn di Stage 2 Inspire, sra. Osyth Henriquez di Aruba Ocean Villas y sra. Suzy Maduro di Suzy Maduro Consultancy. E grupo ta reuni tur luna pa intercambia experencia cu otro.

Logo ExprodeskTuma contacto cu Exprodesk 

Minister di Finasa, Asunto Economico y Cultura, Xiomara Maduro kier encurasha specialmente e hende muhe comerciante di Aruba pa haci uzo di e servicionan cu Exprodesk di DEZHI ta ofrece. Ademas e mandatario ta gradici tur participante di e incubadora 'Empowered Women Exporters' pa nan iniciativa pa sostene otro den e mundo di negoshi y exportacion. Pa mas informacion bishita www.exprodesk.com of tuma contacto via 521-2400.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options