Exposicion e historia di Censo 1960-2010

Dit item is gearchiveerd op 02-08-2020.

ORANJESTAD - Oficina Central di Estadistica (CBS) kier a informa y alabes invita e pueblo di Aruba pa e exposicion “E historia di Censo 1960-2020”.

E expo aki ta conta e historia di Censo. E Censo ta duna nos e historia di e poblacion di Aruba y con esaki a desaroya den transcurso di e decadanan.

Manera ta conoci cada 10 aña ta haci un Conteo General di Poblacion y Vivienda, mihor conoci como Censo. Un Censo tin como proposito principal pa haya contesta riba cuater pregunta cardinal:

  1. Ken nos ta;
  2. Cuanto nos ta;
  3. Con nos ta biba;
  4. Na unda nos ta biba.

Collage CensusDen e expo ta ilustra e desaroyonan cu a tuma lugar den e poblacion di Aruba for di aña 1960 te cu 2010, cu e datonan di e Censonan cu a tuma lugar cada pasa 10 aña. A parti e expo abase di e 4 preguntanan cardinal ariba menciona. A categorisa cada pregunta den diferente tema, entre otro, e cantidad di habitantenan di Aruba, pais di nacemento, nacionalidad, educacion y empleo, pa menciona algun.

Tambe un parti di e expo ta dedica na e Metanan di Desaroyo Sostenibel (SDG’s) di Nacionnan Uni. Den e parti aki ta duna un corto introduccion di e 17 metanan y ta ilustra algun dato relata na e metanan aki.

Tambe lo tin diferente video documentario cu CBS a traha cu ta ilustra cambionan a tuma lugar durante e ultimo decadanan y algun projeccionnan di e poblacion di Aruba.

Archivo Nacional Aruba tambe ta forma parti di e expo y a keda encarga cu  tarea pa ilustra con den pasado, tabata haci otro tipo di “conteo” di población. Ta ilustra esaki den forma di material y potretnan di antes.

Edificio Archivo Nacional ArubaArchivo Nacional Aruba (ANA) tambe ta expone informacion tocante scalivitud na Aruba pa cual awe 1 di juli ta conmemora 157 aña di e fin di sclavitud na Aruba.

E participacion di ANA na e exposicion tabata posibel door di e  financiamento cu nan a ricibi di e.o. Fundacion Amigonan di Archivo y di UNOCA. Un danki ta bay na e instancianan aki pa nan contribucion valioso.

CBS kier a duna un danki tambe na Archivo Nacional Aruba pa e uzo di nan edificio pa por expone e historia di Censo.

E expo lo ta accesibel pa publico entrante diahuebs 2 di juli te cu fin di aña 2020. E expo ta tuma lugar na e edificio di Archivo Nacional Aruba (Sabana Blanco 60) durante oranan di oficina: 8:00-12:00 pm y 1:30-4:00 pm.  E exposicion aki ta completamente gratis.

E exposicion tambe lo ta habri pa publico diasabra awo dia 4 di juli 2020, for di 10 or di mainta te cu 2 or di merdia. Henter pueblo di Aruba ta bon bini.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options