Ex edificio di DOW ta proyecta pa ser converti den kantoor di APA y un Visitor Informacion Center

E edificio aki ya pa 15 aña ta bandona y ta un bista menos agradabel pa nos bishitantenan crucero. Ya caba pa algun tempo Gobierno a cuminsa explora e posibilidadnan pa Aruba Ports Authority (APA) tuma e edificio aki over, teniendo na cuenta cu pronto lo cuminsa e desaroyonan di Port City, a base di cual APA lo tin pa muda for di su edificio actual.

E idea ta pa APA tuma e edificio di DOW over, renoba esaki completo. Como esaki ta un edificio basta grandi ta bay comparti e edificio di manera cu e piso 2 ta bira oficinanan di APA. Aruba Tourism Authority (ATA) ta bay bay huur piso 1 di e edificio aki y lo bay converti e piso aki den un Visitor Information Center (VIC) pa brinda informacion na nos bishitantenan.

E VIC lo ta bon ubica di manera cu nos turistanan crusero por yega facil na dje. Esaki lo bay bira uno centro super moderno y luhoso. E VIC lo brinda tur informacion di kico tur tin di haci na Aruba, tur e actividadnan, nos mihor beachnan, lista di restaurant y nan menu, nightlife, transporte y mucho mas. E lo sirbi como un guia pa e turista asina cu e baha di e barco crucero.

Minister Oduber a presenta su plan na Conseho di Minister. Mas informacion por haya den e anuncio adhunto (na Hulandes):

• 2023023- Bekendmaking beleidsvoornemens m.b.t. ex-DOW gebouw

Denter di poco lo tin ceremonia oficial caminda lo bay firma un MOU entre Ministerio di Turismo, Gobierno di Aruba, APA, ATA, Stichting Monumentenfonds Aruba y Monumenten Bureau.

Finalmente Minister Dangui Oduber ta spera cu por concretisa tur esaki e aña aki ainda pa asina e renobacion por cuminsa pa APA por tin un kantoor nobo y Aruba por tin su centro di informacion pa turistanan super modern cu nos tur por ta orguyoso di dje.