Entrante dialuna 05 juli 2021 Departamento di Salud Publico (DVG) ta cuminsa vacuna muchanan di 12 aña contra COVID-19

ORANJESTAD - Recientemente Aruba a ricibi e aprobacion pa cuminsa ofrece e vacuna di Pfizer na muchanan cuminsando for di 12 aña.

Na prome instante a informa cu lo vacuna e grupo di 12 pa 16 aña cu condicionan di salud cu ta na risico di complicacion serio si bin den contacto cu e virus. Pero debi na e efectividad y seguridad halto di e vacuna di Pfizer, Hulanda, Aruba y islanan den reino Hulandes a ricibi e autorisacion pa vacuna tur mucha sin exepcion cu e vacuna di Pfizer.

Apesar cu e virus di COVID den mayoria caso cerca mucha ta manifesta su mes cu sintoma leve, tin algun caso di muchanan cu a keda interna pa extra cuido y tin mucha cu a keda cu kehonan di salud pa tempo largo. Tambe door di vacuna mas grupo di edad den nos comunidad nos ta reduci grandemente e posibilidad pa brote di e virus bou di muchanan, cu tur e consecuencia cu esaki ta trece cu ne pa salud y desaroyo di muchanan por ehempel den educacion.

Covid-19 vacuna disponibel pa muchanan di 12 aña contra COVID-19Pa un mucha entre 12 cu 16 aña ricibi e vacuna ta nesesario pa e mayor /voogd di e mucha registra y aplica pa e vacuna siguiendo e instruccionan aki:

  1. Via Aruba Health App, traha un profile di e mucha y yena tur su datosnan.
  2. Ora caba di traha e profile di e mucha, request e vacuna.
  3. Pa muchanan mayor di 16 aña esaki ta suficiente.
  4. Pa muchanan menor di 16 aña, e mayor/voogd di e mucha mester subi online riba www.dvg.aw/traha-cita y yena e file “solicita vacuna di covid-19- 12 pa 17 aña”
  5. Si mayor/voogd di e mucha no tin acceso na internet of na e sistema digital esaki no ta problema, por registra e mucha tambe door di yama 280-0101 of por pasa personalmente na Centro Libertador Betico Croes di dialuna pa diabierna entre 8:30 cu 11:30 di mainta pa registra of por pasa na DVG su oficina na Caya Ing. Roland Lacle #4 y registra durante oranan di oficina.

Departamento di Salud Publico na e momento aki ta bezig cu e parti organisatorio pa dia 10 di juli organisa Vacunathon Youth Edition. Manera cu tin mas informacion riba esaki DVG lo informa comunidad debidamente. Riba e dia aki un mayor mester presenta cu e yiu menor dia edad pa registra y vacuna na mesun momento. Mayor cu ainda no a vacuna, por vacuna hunto cu su yiu.

Pa cualkier informacion, subi nos website www.dvg.aw of nos facebook page of por yama na 522-4200 of 280-0101.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options