Entrante 4 di december ta cuminsa acepta pago di impuesto pa vehiculo di motor 2018

E fecha final pa paga e impuesto di aña 2018 ta 31 di januari 2018. Pa e fecha aki tur cliente cu tin un number cu no ta di e categoria ‘A’, por ehempel TX, DT, B, O, MFA, V of plachi personalisa, mester tin e impuesto di aña 2018 full paga. Solamente e clientenan cu tin un number di e categoria ‘A’ por scoge pa paga e impuesto den dos biaha pa aña no mas laat cu:

• Prome mita di e impuesto: 31 di januari 2018
• Di dos mita di e impuesto: 30 di juni 2018.

Departamento di Impuesto ta spera cu asina su clientenan por haya un poco mas tempo pa cumpli cu e pago. Ta recomendabel pa no warda te na ultimo momento pa evita rijnan largo. Alabes ta recomenda e clientenan cu tin e posibilidad pa paga via banco, pa haci esaki sea personalmente of online.

E gasto administrativo di e stickernan ta Afl. 3,- (mita aña) of Afl. 6,- (ful aña). E clientenan cu ta paga via banco tin cu corda pa inclui e suma pa e sticker den e suma cu ta bay paga.