Entrante 1 di october proximo mester inclui BBO/BAVP y BAZV den prijs

Manera ta conoci, entrante 1 di januari 2019 tin dos cambio importante den e ley di BBO/BAVP y BAZV, esta:

1. Ta prohibi pa laga e consumidor paga un otro prijs na caha cu no ta menciona riba e producto/servicio den e tienda.

• Ta prohibi pa menciona e BBO/BAVP y BAZV riba e recibo of factura.

Pa duna e comerciantenan mas espacio pa por a adapta nan prijsnan di acuerdo cu e cambio di ley menciona, cu aprobacion di Minister di Finansa, Asunto Economico y Cultura, a brinda e espacio necesario door di duna e comerciantenan 9 luna di tempo extra.

Mientrastanto a sigui delibera cu comerciante y otro instancia di interes y a base di e reunionnan aki Minister di Finansas, Asunto Economico y Cultura a anuncia e siguiente decision cual ta valido entrante 1 di october 2019:

• Tur comerciante ta ofrece un solo prijs pa su articulo/servicio y no mag cobra  cliente un otro suma na caha. Pues si un articulo ta costa Afl. 50,00 esaki ta e suma cu e consumidor mester paga na caha. No mag cobra e consumidor un suma mas cu Afl. 50,00. Pues e stipulacion den ley cu a keda introduci entrante 1 di januari 2019 ta keda valido.
• Ta permiti pa menciona e porcentahe di 6% y e suma corecto di BBO/BAVP y BAZV riba e recibo of factura. Cu ‘menciona’ no kiermen cu ta bay pone un calculacion riba e recibo of factura manera ta sosode actualmente. Mester tene cuenta cu no por menciona un otro porcentahe of un otro suma di impuesto cu no ta cuadra cu e tarifa legal cu ta un tarifa combina di 6%.

Pues comerciante ta haya permiso pa menciona e impuesto riba recibo of factura, pero esaki NO ta obligatorio. E comerciante mes ta dicidi si e ta bay haci esaki of no. Si acaso un comerciante scoge pa menciona e impuesto, esaki por sosode solamente conforme un di e tres forma aproba door di gobierno. Den e grafico adhunto por mira e tres opcionnan for di cual un comerciante por scoge.

Ta importante pa menciona cu BBO/BAVP y BAZV ta impuesto cu ta calcula riba e volumen di benta (omzet). E volumen di benta ta e suma total cu e comerciante ta ricibi den su caha pa e articulo of servicio cu el a bende. E suma di BBO/BAVP y BAZV cu e ta cobra su cliente ta parti di su volumen di benta (omzet).

Conclusion

Entrante 1 di october 2019 e comerciantenan tin cu mantene un solo prijs y ta permiti pa menciona e impuesto riba recibo of factura. Mag di menciona solamente e tarifa legal di 6% y e suma corecto di BBO/BAVP y BAZV.