Entrante 1 di januari 2021 ta reduci e tarifa di inkomstenbelasting y loonbelasting

ORANJESTAD – Entrante 1 di januari 2021 lo tin cambio den e tarifa di inkomstenbelasting y loonbelasting. Manera conoci e mesun tarifa cu ta valido pa inkomstenbelasting ta valido tambe pa loonbelasting.

Edificio Departamento di ImpuestoE tarifa aki ta hopi importante tanto pa e personanan priva como e doñonan di trabou. E cambio ta encera un reduccion di e actual tarifa, cual ta nifica cu e contribuyentenan lo bay paga menos inkomstenbelasting y loonbelasting den 2021. Specialmente e clase trahador lo bay ripara cu su doño di trabou lo bay retene menos loonbelasting durante 2021 y asina e empleado lo ricibi mas salario den su man.

Consideracionnan

Reduccion di e tarifa di impuesto ta parti di e proceso di Reforma Fiscal cu Minister di Finansas, Economia y Cultura hunto cu e comision encarga ta realisando desde aña 2019 ora cu a simplifica e sistema di tarifa y a aumenta e suma liber di impuesto te na Afl. 27.751. Pa aña 2020 a continua cu e cambionan stipula y a aumenta e suma liber di impuesto te na Afl. 28.861.

Durante aña 2020, e pandemia causa pa Covid-19 a percura pa un situacion di emergencia social-economico serio cu ta tuma tempo pa sali for di dje. Entre otro hopi hogar a sufri perdidanan di entrada considerablemente. Entretanto gobierno di Aruba a start e proceso di recuperacion di economia y ta haya necesario pa reduci e tarifa di inkomstenbelasting y loonbelasting pa asina brinda mas espacio financiero na e contribuyentenan. E decision aki lo yuda trece alivio tambe den e poder di compra y stabilisa e economía.

E tabel nobo di inkomstenbelasting/loonbelasting 2021

E tabel nobo di inkomstenbelasting/loonbelasting 2021 ta como lo siguiente:

Tabel nobo inkomstenbelasting/loonbelasting 2021 

Na un entrada di mas cu e
suma menciona den kolom I,
pero no mas cu e suma
menciona den kolom II,

e suma di impuesto ta bira e suma menciona den kolom III hunto cu e
suma calcula a base di e porcentahe menciona den kolom IV.
Ta calcula e porcentahe riba e parti di entrada cu ta surpasa e suma
menciona den kolom I.

I II III IV
1. - 34.930 - 12,00%
2. 34.930 65.904 4.191,60 23,00%
3. 65.904 147.454 11.315,62 42,00%
4. 147.454 - 45.566,62 52,00%
Splicacion

Suma liber di impuesto
(belastingvrije som)

Afl. 28.861 (ta keda igual cu aña 2020)

Categoria di entrada
(inkomensschijven)

  • Pa tur 4 categoria di entrada ta reduci e sumanan menciona den kolom III.
  • Pa categoria di entrada 1 ta reduci e porcentahe menciona den kolom IV te na 12% (esaki tawata 14%).
  • Pa categoria di entrada 2 ta reduci e porcentahe menciona den kolom IV te na 23% (esaki tawata 25%).

Con ta haci e calculacion di impuesto?

Aki ta sigui un splicacion di e forma cu ta calcula e suma di impuesto.

  • Prome cu aplica e tabel pa calcula e suma di impuesto mester deduci e suma liber di impuesto (belastingvrije som) di Afl 28.861.
  • Na final ta haci e suma di impuesto cu a wordo calcula, un suma cera.
Ehempel:

Entrada fiscal
Suma liber di impuesto

Afl. 68.864
Afl. 28.861  -/-

Entrada riba cual ta aplica e tabel
Kita suma di kolom II (categoria 2)

Afl. 40.003
Afl. 34.930  -/-     → mira categoria di entrada nr. 2

Saldo Afl. 5.073

Impuesto riba Afl. 34.930 segun kolom III (categoria 2)
Impuesto riba Afl. 5.073 → 23% segun kolom IV

Afl. 4.191,60
Afl. 1.166,79

Suma total di impuesto Afl. 5.358,39
Inkomstenbelasting of loonbelasting cu mester paga

Afl. 5.358 (pa aña)

Departamento di Impuesto tin un Excel file ‘Berekening IB-LB 2021’ cual su clientenan por uza pa calcula e suma di impuesto automaticamente. 

Decreto Ministerial

Pa por ehecuta articulo 25 inciso 3 y 4 di e ley di inkomstenbelasting a formalisa e cambionan di e tarifa den e Decreto Ministerial emiti dia 28 di december 2020
(AB 2020 no. 207).  

Departamento di Impuesto tin un Excel file cual su clientenan por uza pa calcula e suma di impuesto automaticamente.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options