Encuesta nacional di salud STEPS ta den preparacion pa ranca sali

E encuesta di STEPS lo cuminsa 4 di maart 2023 y lo termina  27 di mei 2023. E ta un encuesta nacional di salud pa asina Gobierno por haya un mihor bista riba e estado di salud di nos poblacion a traves di e datonan colecta. Ultimo biaha cu algo asina a tuma lugar na Aruba tabata na aña 2006.

E encuesta STEPS ta manera un Censo pero di salud. Den e encuesta ta bay haci hopi preguntanan di salud. Ta sospecha cu 80% di Aruba su poblacion tin sobre peso y pa es motibo ta bay midi e indice di e masa corporal (BMI) di nos poblacion. Durante e encuesta tambe lo tuma e presion y check nivel di sucu di e personanan den e hogar. Tur esaki pa haya un mihor bista cuanto persona den nos comunidad tin of ta core e risico pa haya malesanan no transmisibel (NCD’s).

Aruba tin un plan nacional di prevencion di e malesanan no transmisibel desde 2020. Aruba a logra traha e plan nacional di prevencion cu ayudo di tur stakeholders aki na Aruba y cu e guia di PAHO. Aruba ta un di e poco paisnan den Caribe cu tin un plan nacional di prevencion. E plan aki mester a bay na vigor na aña 2020 pero lamentablemente Aruba a haye confronta cu e pandemia na maart 2020 y tur cos a frena. Actualmente e plan nacional di prevencion ta full speed den ehecucion.

Den   maneho di Ministerio di Salud continuamente ta haci inversionnan den cuido poniendo e parti di prevencion central. A introduci e ley “LV Beperking Tabaksproducten”, un ley hopi importante den cuadro di e plan nacional prevencion di malesanan no transmisibel. A introduci proyectonan manera Jump 18 y tambe scol saludabel. Siman pasa e centro di “Healthy Lifestyle center” tambe a habri su portanan pa comunidad.

Prevencion den salud ta di vital importancia pa por mehora e calidad di bida di nos comunidad. E mandatario ta kere den campañanan di prevencion caminda ta percura pa tur cuidadano hiba un bida mas saludabel. Pa nan tene na cuenta locual cu nan ta consumi y pa tin un sociedad cu ta haci ehercicio diariamente y tambe ta haci na chekeo mediconan na tempo.

Aruba ta yegando na su meta pa tin un cuido mas eficiente,  efectivo y mas sostenibel. Minister Dangui Oduber ta gradici departamento di salud publico pa tur e trabounan haci, STEPS 2023 sigur lo ta exitoso.