DVG ta sigui atende cu casonan sospechoso di Monkeypox

ORANJESTAD - Na e momentonan aki Departamento di Salud Publico (DVG) ta investigando un otro caso sospechoso di Monkeypox.

Apesar cu ainda mester confirma e caso pa medio di test di laboratorio, clinicamente e sintomanan presenta ta cuadra cu un caso tipico di Monkeypox, pero ta despues cu caba di compila tur informacion necesario so, lo clasifica esaki  como un caso confirma, un caso probabel of lo descarta Monkeypox. Pa por ta 100% sigur mester warda resultado oficial di testnan haci pa laboratorio cu ta dura 3 pa 4 dia.

Ta trata aki di un persona residente di Aruba cu tin un historia di biahe pa Colombia recientemente. Na e momentonan aki DVG ta bezig cu tur investigacion necesario segun protocol pa pone famia y contactonan cercano den cuarentena, tuma muestranan necesario pa manda Hulanda pa diagnostico y duna guia y sosten necesario na e persona encuestion y na su famia enespera di resultado di testnan haci.

Monkeypox virusContagio cu Monkeypox ta sosode: di hende pa hende pa medio di:

  • Contacto directo cu un persona infecta.  
  • atravez di particulanan (droplets) for di e boca/garganta di e persona infecta. Evita di tin contacto hopi cerca cu hende cu ta sinti malo, por ehempel cara cu cara, cuero cu cuero, sunchi, brasa, caricia y mantene relacion sexual;
  • contacto cu e likido procedente di e blarnan presente cerca e persona infecta (skin to skin of paña contamina);
  • Persona na estado por contagia e fetus via e placenta.

Sintomanan di Monkeypox por inclui:

  • Keintura;
  • dolor di cabes;
  • kliernan hincha;
  • dolor di curpa;
  • cansancio.

Entre 1 te cu 3 dia despues di e keintura, ta aparece un rash (blaar) cu den mayoria di e casonan ta afecta cara, mannan y pianan. E rash na su turno ta transforma den blaar cu pus aden.

Por confundi Monkeypox cu otro malesanan manera Smallpox, Bruela, of Impetigo, pa cual motibo ta importante pa un persona cu e sintomanan aki tuma contacto cu nan dokter di cas pa haci e testnan necesario y asina haya un diagnostico  corecto. 

Pa mas informacion like nos Facebook page Directie Volksgezondheid DVG Aruba, subi nos website www.dvg.aw, yama nos na 5224200 of mail nos na servicio@dvg.aw.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options